Pagsaka sa presyo sa kuryente masinati

CEBU, Philippines — Ang mga konsumidor sa Metro Cebu makasinati og pagsaka sa bayranan sa kuryente karong Hunyo human gipahibalo sa Visayan Electric tungod sa kombinasyon sa mga hinungdan kalabot sa merkado ug sa grid nga nakaapekto sa power system sa Visayas.

Ang Visayan Electric nga ikaduhang pinakadakong kompaniya sa distribusyon sa kuryente sa nasud nagkanayon nga ang gipaabot nga pagsaka sa singil nag-una gikan sa mas hugot nga kahimtang sa suplay sa kuryente sa Visayas Grid.

Ang pagsaka sa panginahanglan sa kuryente ug ang limitado nga operating reserves niadtong Mayo maoy hinungdan sa daghang yellow ug red alert declarations diin resulta kini sa dako nga pagsalig ngadto sa mas mahal nga mga tinubdan sa kuryente ug sa paggamit gikan sa spot market aron masiguro ang igo nga suplay.

Ang kompanya miingon nga ang gasto sa paghimo og kuryente misaka usab tungod sa mas taas nga presyo sa Wholesale Electricity Spot Market (WESM), sa padayon nga paghuyang sa bili sa piso batok sa US dollar, ug sa padayon nga pagsaka sa presyo sa fuel sa tibuok kalibotan, nga nakaapekto sa gasto sa kuryente nga gipalit gikan sa mga power supplier.

Apan bisan sa maong mga hinungdan, ang Visayan Electric nagkanayon nga adunay mga lakang nga ilang gipatuman aron mapagaan ang epekto sa pagsaka sa presyo ngadto sa mga konsumidor.

Samtang gilaoman ang pagsaka sa singil sa kuryente gihangyo sa kompaniya ang mga konsumidor nga magkat-on sa pagdaginot sa enerhiya aron makatabang sa pagdumala sa ilang binuwan nga bayranan diin limitahan ang paggamit sa appliances nga dako og konsumo sa kuryente panahon sa peak hours ilabina gikan sa ala 1:00 sa hapon hangtud alas 4:00 sa hapon ug gikan sa alas 6:00 sa gabii hangtud alas 9:00 sa gabii diin labing taas ang panginahanglan sa kuryente.

Girekomenda usab sa kompaniya ang pag-set sa air conditioner sa energy-efficient nga temperatura nga 25 degrees Celsius, regular nga paglimpiyo sa mga filter sa appliances aron mapadayon ang ilang kaepektibo ug ang pagtangtang gikan sa outlet sa electronic devices ug chargers kon dili gamiton aron malikayan ang dakong konsumo sa kuryente.  BDB BANAT NEWS