“Walang Gutom Kitchen” gilusad dinhi sa siyudad sa Sugbo

CEBU, Philippines — Gipahibalo ni Presidente Ferdinand Marcos Jr. nga padayon nga palapdan sa gobyerno ang Walang Gutom Program sa Department of Social Welfare and Development (DSWD) aron matubag ang problema sa kagutom ug mapalig-on ang ayuda sa pagkaon alang sa mga bulnerableng Pilipino.

Atol sa paglusad sa Walang Gutom Kitchen sa Cebu City kagahapon, diin iyang gibisita ang pasilidad, si Marcos miingon nga ang kusina magserbisyo sa mga indibidwal nga nakasinati og involuntary hunger ug kadtong anaa sa kahimtang sa pagkinabuhi sa kadalanan, ug gipasabot nga ang mga benepisyaryo mahimong mobalik-balik alang sa pagkaon.

“Pwede silang bumalik-balik dito dahil walang problema. Ang ginagawa ng sistema, pagpasok dito irerehistro nila, magkakaroon sila ng ID para malaman din namin kung sino yung mga hindi talaga madalas kumain para mabigyan natin ng tulong,” suma pa ni Marcos.

Ang sistema naglakip sa rehistrasyon ug pag-ila sa mga benepisyaryo aron matabangan ang mga social worker sa gobyerno sa pag-monitor ug pagtino kung kinsa ang nagkinahanglan pa og dugang nga suporta.

Gisaligan usab sa Presidente ang suporta sa pribadong sektor, ilabi na ang mga asosasyon sa hotel ug restawran, nga nagdonar sa sobra apan luwas nga pagkaon alang sa programa.

Matud ni Marcos nga plano sa gobyerno nga palapdan pa ang network sa Walang Gutom Kitchens sa tibuok nasod, ug adunay laing pasilidad nga hapit na ablihan sa Zamboanga.

Samtang, si DSWD Secretary Rex Gatchalian miingon nga ang Walang Gutom Kitchen sa Cebu mao na ang ikaduha nga pasilidad human sa unang pagpatuman sa Pasay City.

Ang pasilidad sa Cebu mahimong fully operational, nga adunay unang limitado nga serbisyo sa nahibiling mga adlaw sa Hunyo, ug regular nga operasyon magsugod sa Hulyo.

Ang kusina makahimo og pagserbisyo sa mga 259 ka indibidwal matag meal service ug gidisenyo aron motabang sa mga low-income workers, lakip na kadtong anaa sa construction ug port communities.

Ang DSWD adunay kasabutan sa Philippine Hotel Owners Association ug padayon nga nakigtambayayong sa dagkong food establishments sama sa McDonald’s ug Jollibee alang sa mga inisyatibo sa pag-recover sa sobra nga pagkaon.

Ang inisyatibo konektado usab sa Tara, Basa! Tutoring Program ug naglakip sa mga dugang nga serbisyo sama sa basic health referrals, literacy support, ug temporary shelter assistance alang sa mga kwalipikadong benepisyaryo.

Ang Walang Gutom Kitchen” nahimutang sa Barangay Tejero sa Dakbayan sa Sugbo nga gidumala sa DSWD, diin ang serbisyo sa pamahaw magsugod sa alas 6:00 sa buntag, ug ang paniudto magsugod sa alas 11:00 sa buntag.

Samtang gikalipay ni Cebu City Mayor Nestor Archival ang maong inisyatiba nga makatabang sa mga tawo nga anaa nagpuyo kilid sa kadalanan ilabi na sa mga mendicants nga gibana-bana sa mayor nga anaa sa 300 ka mga hamtong og edad lakip na ang mga bata. — Preciosa L. Bacalso, MEL BANAT NEWS