Marcos mobisita karong adlawan sa Cebu

CEBU, Philippines — Si Presidente Ferdinand “Bongbong” Marcos Jr. gikatakda nga mobisita sa Cebu karong adlawa, Lunes, Hunyo 22, 2026, alang sa sunod-sunod nga opisyal nga kalihokan may labot sa kalamboan sa imprastraktura ug mga inisyatiba sa seguridad sa pagkaon.

Ang Pangulo una nga mo-inspeksyon sa nagpadayon nga konstruksyon sa Metro Cebu Expressway Segment 3A sa Barangay Cansang-an, Dakbayan sa Naga.

Ang maong proyekto kabahin sa dagkong transport infrastructure program sa gobyerno nga nagtinguha sa pagpahapsay sa grabeng trapiko sa Metro Cebu ug sa paglambo kadalanan sa habagatang bahin sa lalawigan.

Sunod, mopadayon si Marcos sa Barangay San Isidro sa Dakbayan sa Talisay para inspeksyonon ang rehabilitasyon sa Mananga River.

Ang proyekto kabahin sa mga paningkamot sa gobyerno sa flood control ug river management sa tinguhang mamenusan ang problema sa baha ug risgo niini sa mga residente panahon sa kusog nga ulan.

Ang katapusang destinasyon sa pagbisita sa Pangulo mao ang “Walang Gutom” Kitchen nga nahimutang sa Pier 4 sa Cebu City. Ang maong inisyatiba kabahin sa anti-hunger program sa administrasyon nga nagahatag og libreng pagkaon kada adlaw alang sa mga pamilyang gamay ra og kita sa mga urban areas.

Gilauman nga mouban sa Pangulo ang mga opisyal sa gobyerno lakip si Secretary Vivencio B. Dizon sa Department of Public Works and Highways, Secretary Rexlon T. Gatchalian sa Department of Social Welfare and Development, Secretary Maria Cristina Aldeguer-Roque sa Department of Trade and Industry, ug uban pang opisyal aron maghatag og updates sa kahimtang ug progreso sa mga proyekto.

Kining pagbisita balik sa presidente dinhi sa Sugbu parte ni sa padayong pokus sa administrasyon sa pagpalapad sa imprastraktura, disaster resilience, ug social welfare programs sa Cebu, usa sa mga importanteng economic centers sa nasud.

Sa iyang pinakaulahing pagbisita sa Cebu niadtong Mayo 8, 2026 atol sa opening ceremony sa 48th ASEAN Summit ug uban pang kalihokan, gipangusgan ni Marcos ang importansya sa regional cooperation ug economic stability rehiyon. — /IBM (BANAT NEWS)