IDC nisusi sa mga importanteng imprastraktura

CEBU, Philippines — Gisusi sa Infrastructure Development Committee (IDC) sa Regional Development Council (RDC) sa Central Visayas ang mga importanteng inisyatibo sa imprastruktura ug gihisgotan ang mga prayoridad nga mga lakang aron mapadayon ang kalamboan sa rehiyon atol sa ikaduhang quarter nga tigom nga gipahigayon niining ulahi lang sa Dakbayan sa Sugbo.

Atol sa tigom, gisuta sa RDC-IDC ang dagkong kalampusan ug mga hagit sa kalamboan nga gilatid sa calendar year 2025 Regional Development Report (RDR) nga nagpakita sa pag-uswag, mga nitumaw nga hagit ug mga prayoridad nga intervention alang sa sektor sa imprastruktura.

Gihisgutan sa mga miyembro sa komitiba ang kahimtang sa mga estratehikong pamuhonan nga gitumong sa pagsuporta sa mga kalamboan sa rehiyon ilabina ang mga proyekto kalabot sa pisikal ug digital nga konektibidad ingon man sa suplay sa tubig ug pagpalambo sa enerhiya.

Kini nga mga pamuhonan giila nga importante sa pagpaayo sa mobilidad ug pagsiguro sa kasaligan nga suplay sa tubig ug kuryente sa tibuok Central Visayas.

Ug tungod sa nagkadakong panginahanglan alang sa hiniusang pagdumala sa baha, gihisgotan usab sa komitiba ang gisugyot nga pagpalapad sa Technical Working Group (TWG) sa stormwater management ug flood control pinaagi sa paglakip og dugang nga mga miyembro.Ang maong lakang gitumong sa pagpalig-on sa koordinasyon tali sa mga ahensiya ug mga stakeholder nga nalambigit sa mga paningkamot sa pagpugong sa baha. Matud sa komitiba nga ang pagpalapad sa miyembro sa TWG makapalig-on sa teknikal nga kolaborasyon ug makahatag og mas dakong suporta sa pag-update ug pagpatuman sa mga programa sa flood control ug drainage management sa Metro Cebu ug uban pa’ng mga lugar sa rehiyon nga kanunay’ng mabahaan.

Gikonsidera usab sa IDC ang pagpalugway sa operasyon sa Task Force SIETE o Sustainable Implementation through Enhanced Coordination and Timely Engagement, usa ka ad hoc nga lawas nga gitahasan sa pagpasayon sa koordinadong pagplano ug pagpatuman sa dagkong mga proyekto sa imprastruktura sa Central Visayas. BDB BANAT NEWS