Piattos o nukos-nukos?
Atong bantayan karong Lunes. Ang tagal sa Senate Impeachment Court para sa prosekusyon ug depensa sa impeachment trial ni Bise Presidente Sara Duterte pagsumiter sa ilang pre-trial briefs. Makalili na ta sa lista sa mga testigo nga ipatawag atol sa husay.
Mahibaw-an na kon ilista ba sa House panel of prosecutors si Ramil Madriaga. Kay nagpasabot nga kumbinsido silang makatabang si Madriaga pagpalig-on sa pasangil nga gibolsa ni VP Sara ang P612.5 milyones nga confidential funds. Pero mas daghang nag-atang kon ilista bang VP Sara si Mary Grace Piattos.
* * *
Kon apilon si Piattos, nagtimaan nga nakahukom si VP Sara pagpakita sa mga nakadawat sa confidential funds uban ang ilang mga pirma aron paglalis sa pangangkon sa Philippine Statistics Authority nga peke ang mosunod nga mga ngalan:
Mary Grace Piattos, Kokoy Villamin, Pia Piatos-Lim, Renan Piatos, Xiaome Ocho, Jay Kamote Miggy Mango, Dodong Alcala, Dodong Bina, Dodong Bunal, Dodong Darong, Dodong S. Barok, Honeylet Camille Sy, Feonna Biong, Feonna Villegas, Fiona Ranitez
Ellen Magellan, Erwin Q., Ewan Gary Tanada, Joel Linangan, Amoy Liu, Fernan Amuy ug Joug De Asim.
* * *
Kon dili maapil sa lista sa mga saksi ni VP Sara si Piattos, nagpaabot nga gipili ang laing linya sa depensa: Mga alyas ang gilista aron pagpanalipod sa seguridad sa mga nakatabang sa ilang surveillance operations ginamit ang confidential funds.
Mahimong giisip nga mas sayon nga malutsan ang paglapas ni VP Sara sa lagda nga kon mogamit og alyas ilista ang tinuod nga mga ngalan sa ledger, isulod sa selyadong envelope ug i-deposito sa vault sa Commission on Audit.
* * *
Duna pa gyoy laing kapilian si VP Sara: Dili mosumiter og pre-trial brief sa Hunyo 15 ug dili motambong sa pre-trial conference sa Hunyo 18. Kay huwaton una ang desisyon sa Korte Suprema sa iyang petisyon nga nagkuwestiyon sa impeachment proceedings sa House Justice Committee.
Kon mag-nukos-nukos na sab, maklaro ang tinuod nga motibo sa pag-isnab sa unang hugna sa articles of impeachment batok niya sa niaging tuig ug sa susamang mga pasangil karong tuiga: Pagbaraw sa impeachment trial aron dili kaablihan ang bank accounts ug ubang mga ebidensiya nga makaguba sa ambisyon nga mag-presidente sa 2028.
* * *
- Latest
