Cebu andam nang mo-host sa SLA Junior World Showcase

CEBU, Philippines — Taas ang gipaabot ug gilauman sa mga partisipante sa dihang ang dakbayan sa Sugbo mo-host sa giatngan nga Sinag Liga Asya (SLA) Junior World Showcase 2026-Visayas Cup karong Hulyo 1-5.

Si SLA Chairman Rocky Chan nagkanayon nga ang mga internasyonal nga delegado naglantaw sa unahan ngadto sa makasaysayanong kalihukan uban ang tumang kahinam dili lamang sa kompetisyon apan hasta na sab sa ilang pagpuyo sa siyudad.

Gikumpirma sab ni Chan nga bisan pa sa krisis sa Middle East, walay langyaw nga team nga miatras sa lima ka adlaw nga torneyo nga mopasundayag sa batan-ong mga talento gikan sa nagkadaiyang nasud.

“The teams, especially our international delegates, have high expectations for the Cebu leg of our tournaments. Despite the war crisis, nothing has changed or not a single team from our international group has pulled out. They are also excited to have a glimpse of Cebu with their families during their stay,” matud pa ni Chan.

Mao kini ang rason nga ang mga organizers mihan-ay ug mipahugot og maayo sa ilang preparasyon alang ning labing dako ug labing bongga nga liga sa basketbol nga moigo sa Sugbo.

Ang kulbahinam ug makalingaw nga aksiyon ipahigayon sa upat ka binyu nga mao ang Cebu Coliseum, Magnum Sports Complex, University of San Carlos (USC)-Downtown Campus, ug Cebu City Sports Institute.

Gawas sa Cebu ug uban pang mga teams gikan sa Luzon, Visayas, and Mindanao, mokumbati sab ang mga masaarong players gikan sa Amerika, Canada, United Kingdom, Europe, ug United Arab Emirates.

“Expect an exciting week of grassroots basketball and a high level of competition by all the teams. All the venues are free for the public to come and watch the world play in all our game venues,” pasalig pa ni Chan.