Cebu City ug probinsiya nangandam sa Big One

CEBU, Philippines — Gituki ni Konsehal Pastor “Jun” Alcover ang kaandam sa Dakbayan sa Sugbo kon adunay linog nga moigo sa siyudad atol sa regular session sa city hall kagahapon.

Nunot sa pagtay-og ngadto sa Mindanao niadtong Hunyo 8, 2026 gipadayag ni Alcover atol sa iyang privilege speech ang iyang kabalaka diin giusisa niya kong andam ang siyudad kong adunay linog nga moigo.

Ang Department of Science and Technology–Philippine Institute of Volcanology and Seismology (DOST-PHIVOLCS) nipasidaan nga posibleng maigo ang Sugbo sa usa ka linog nga dunay gikusgon nga 7.2 hangtud sa 7.5 magnitude gumikan sa "potentially active fault" ubos sa Cebu Central Fault System diin nalakip ang Cebu City.

Gipahinumdum usab ni Alcover sa konseho ang nahitabong 6.9 magnitude nga linog sa Dakbayan sa Bogo nga nikalas og 79 ka kinabuhi, 1,271 ang naangol ug niguba usab og pipila ka imprastraktura niadtong Septiyembre 30, 2025.

Gihangyo ni Alcover pinaagi sa Office of the Mayor ang Cebu City Disaster Risk Reduction Management Office (CCDRRMO), Cebu City Rescue Unit ug uban pa’ng emerhensiyang rescue agencies nga mosumite og komprehensibong report alang sa earthquake preparedness ug emergency response capability report.

Lakip sa hangyo sa konsehal ang imbentaryo sa kondisyon sa rescue vehicles, kahimanan sa kalamidad, gidaghanon sa personnel ug kondisyon sa komunikasyon kon adunay kapasidad kini nga molungtad sa panahon sa katalagman.

 Giawhag usab ang Office of the Building Official (OBO) nga mosumite usab og report sa pagpagpatuman ug pagpahigayon og inspeksiyon sa mga istraktura pagsuta kong luwas ba kini.

Matud ni Alcover nga dili na angay hulaton nga dunay mahitabong dakong katalagman una pa makita ang kakuwangan sa emergency response system sa Dakbayan sa Sugbo.

Ang matag barangay gilaoman nga i-train mahitungod sa giandamon kong dunay katalagman aron makahibalo ang mga residente kon unsay buhaton sa panahon niini.

Sa laing bahin, gipadayag ni Gobernador Pamela Baricuatro kagahapon ang mga pangandam sa Kapitolyo alang sa posibleng “Big One”.

Kini human nipagawas og pasidaan ang DOST-PHIVOLCS kabahin sa usa ka potensiyal nga aktibong fault sa Sugbo nga mamahimong maghatud og 7.2 ngadto sa 7.5 magnitude nga linog.

Gibutyag ni Baricuatro nga nangandam ang kagamhanan sa probinsiya og lapad nga lugar ug haom sa pasilidad kong ugaling mahitabo ang maong kalamidad.

Ug usa kini sa rason nga wala hilabti ang Visayas Command (VISCOM) sa Baranggay Busay aron magsilbing evacuation area sa Kapitolyo. Andam na usab ang mga mobile clinics sa probinsiya diin kasamtangang aduna na’y tagsa ka unit sa habagatan ug sa amihanan nga bahin sa Sugbo.

Sa pagkakaron padayon ang Kapitolyo sa pagpalit og dugang duha pa ka mobile clinics.

 Andam na usab ang mobile kitchen matud sa Gobernador diin base sa ilang kasinatian una sa Dakbayan sa Bogo dili kaayo maggamit ang food packs tungod kay mas nagkinahanglan ang mga biktima og mga lutong pagkaon o prepared meals. — Andriya Valerie Y. Villarino, Rachel E. Wenceslao (BANAT NEWS)