Pilipinas napakyas masakop sa UNSC

CEBU, Philippines — Napakyas ang Pilipinas nga makaangkon og pwesto sa ekslusibong non-permanent member seat sa United Nations Security Council atol sa final voting niadtong Miyerkules, Hunyo 3, batok sa nasud sa Kyrgyzstan human sa upat ka rounds nga botasyon diha sa UN General Assembly.

Mao pa ni ang labing unang higayon nga napildi ang Pilipinas sa gamhanang UN council human sa upat ka mlampusong nakalingkod sa maong posisyon sukad pa niadtong 1957.

Ang Kyrgyzstan maoy nakakuha sa nag-inusarang Asia-Pacific seat para sa tuig 2027-2028 term pinaagi sa nakuha nilang 142 votes sa fourth round. Lapas sa gikinahanglan lang nga 128 ka boto o two-thirds majority. Ang nakuhang boto sa Pilipinas, 49 lang.

Gikan palang sa first round, nangiwit na ang Pilipinas batok sa Kyrgyzstan hangtud sa sunod-sunod nga botasyon. Ang vote margins 105–85, dayun 110–81, dayun 123–68  ayha pa nakuha sa Kyrgyzstan ang two-thirds majority sa final ballot. Gipaagi kining tanan sa secret ballot.

Mao pa ni ang unang higayon nga ang Kyrgyzstan molingkod sa maong posisyon nga magsugod sunod tuig.

Gidawat ni Foreign Affairs Secretary Theresa Lazaro  ang resulta sa botasyon.

Importante sa Pilipinas ang maong posisyon sa UN Security Council nga gilangkuban og lima ka permanent members nga mao ang France, Russia, China, Amerika ug Britain nga naay veto powers nga nagpasabot nga bisan usa lang nila ang supak sa usa ka resolusyon, mabasura na kini.

Dugang ani ang 10 ka non-permanent members nga walay veto power apan makahimo pagbotar pabor o dili sa mga resolusyon. Ang non-permanent members gibotaran sa 193 ka membro sa UN General Assembly.

Isip membro sa non-permanent UNSC, mahimo silang makaapil sa pagpanday og ceasefires, sanctions ug peacekeeping missions.  Makatabang sab ni sa Pilipinas para sa kaayohan sa nasud sa isyu sa West Philippine Sea.

Ang Pilipinas nahimong miyembro niini niadtong  2004-2005, ug katulo nakalingkod sa posisyon niadtong 1957, 1963 ug 1980-1981.

Ang Palasyo nagtuo nga nakaapektar sa tinguha sa Pilipinas ang kagubot karon sa Senado.