Hearing sa 18-ex marines nadayun

CEBU, Philippines — Nadayun ang pagpahigayon og hearing sa 18 ka ex-marines diha sa Senate Blue Ribbon Committee nga gipangulohan ni Senador Pia Cayetano sukwahi sa eskedyul nga gitakda ni Senate President Pro Tempore Sherwin Gatchalian nga himuon kini karong Lunes, Hunyo 8.

Sa News5 live video report,  makita ang 18  ka ex- Marines nga wala pasudla sa Senate building. Nakita sad si Interior Secretary Jonvic Remulla nga nibabag sa entrada.

Pero pinaagi nilang Sen. Pia Cayetano ug Padilla pugsanon silang nakasulod ug nilahus sa plenary hall ug pagkataud-taod gisugdan ang hearing diin gipanganlan sa mga ex-marines ang mga aktibo ug kanhi mga kongresista, apil na ang International Criminal Court, mga pari ug ingon man si Presidente Ferdinand Marcos Jr., nga nidawat og dagkong kantidad nga gisulod og mga maleta.

Ang Palasyo mihagit sa mga ex-marines pagpakita og ebidensiya nga nidawat og kwarta ang presidente.

Ang tigpamaba sa Palasyo nga si Claire Castro miingon nga gituyo lang kining hearing aron dauton ang pangalan sa presidente bisan og paksyon ni Cayetano wala ilha sa Malacañang isip lehitimong liderato karon sa Senado.

Ang panel, gi preside nilang Sens. Alan Peter Cayetano, Rodante Marcoleta ug Imee Marcos diin ilang gipaminaw ang mga testimonya sa 18 ex- Marines base sa affidavit nga ilang giduso sa Office of the Ombudsman.

Atol sa hearing, walay Senate secretary ug walay mga stenographers, hinungdan sa pagtuong ang maong kalihokan kagahapon dili ilhon nga opisyal nga kalihokan sa Senado.

Tungod kay walay Senate secretary, walay livestreams sa committee hearing kagahapon, bugtong ang mga lehitimong media networks lang ang nag-livestream sa ilang gihimo kagahapon.

Apan bisan pa sa pag-kober sa media didto, gipasanginlan ni Sen. Rodante Marcoleta ang mga tigbalita nga mga binayran hinungdan nga miani siya og pagsaway gikan sa media.

Duha ka paksyon

Ang senado nabahin karon sa duha ka paksyon, ang unta majority nga gipangunahan ni Cayetano nahimong minority human nga nitapon sa grupo ni Gatchalian si Sen. Chiz Escudero niadtong Miyerkules hinungdan nga nagka quorum.

Tungod adto, nakabuhat sa ilang trabaho ang mga Senador ug una nilang gibuhat mao ang pagbakante sa tanang posisyon apil ang Senate President ug mga komitiba, epektibong nagtangtang kang Sen. Alan Peter Cayetano pagka-presidente sa senado hasta ang tanang tsirman sa nagkadaiyang komitiba. Nagbotasyon dayun og mga bag-ong tsirman sa mga komitiba, ug si Gatchalian gipili nga mangulo sa Senado samtang wala pay napiling Senate President tungod kay kinahanglang 13 ang mobotar pa sa maong posisyon.

Pugsanong nanulod sa Senate building silang Sen. Robin Padilla ug Sen, Pia Cayetano  kauban ang 18 ka ex- Marines human sa komprontasyon.

Mahinumdoman nga si Gatchalian nimando nga pasirad-an ang Senate building ug dili pasudlon ang 18 ex-Marines nga resource persons kagahapong adlawa.

Gitakda ang pagpaminaw kanila sa Lunes, Hunyo 8 sa Blue Ribbon Committee hearing ubos sa pagpangulo ni Sen. Erwin Tulfo.