Taod-taod na ang relasyon?

CEBU, Philippines — Miulbo ang chika nga matud pa taod-taod na diay nga mag-uyab sila si Sue Ramirez ug Dominic Roque. Nagdumili  gihapon sila sa paghatag og katin-awan sa ilang tinud-anay nga istado. Paborito nila nga suroyan mao ang Siargao.

Jimmy Morato mipanaw

Mipanaw ang veteran broadcaster ug aktor nga si Jimmy Morato niadtong Martes . Kini maoy gibutyag sa anak ni Jimmy nga si Aldrin Magcale. Wala hinoun mahisgoti ang partikular  nga sakit  nga gikamatyan niini. Usa sa  mga sikat nga pelikula kaniadto sa 78 anyos nga aktor  mao ang " Tisoy" niadtong  1969 kun diin nakapares niya si Pilar Pilapil.

Nakahilak sa Saving Grace

Gibutyag ni Julia Montes nga nakahilak si Coco Martin samtang nitan-aw sa iyang Kapamilya series nga  'Saving Grace'.  Nasayran nga napuno sa emosyon ang mga eksena sa 'Saving Grace' , ang Philippine adaptation sa Japanese drama nga "Mother ". 

Yasmien makighimamat kang Sec. Angara

Gibutyag sa Kapuso actress nga si  Yasmien Kurdi nga gikatakda sila nga mag-abot karong  adawa ni Department of Education Secretary Sonny Angara alang sa bukas nga diskusyon  sa mga stratehiya sa kampanya sa  anti-bullying sulod sa mga eskwelahan.

Paningkamotan gyud ni Yasmien nga mapalanog ang iyang tingoha nga mahunong na ang "bullying" nga nasinati karon sa pipila ka mga tinun-an .

Una na nga gibutyag sa aktres sa niaging adlaw nga biktima pud sa bullying ang iyang anak ug panghinaot niya nga matuldokan  na ang maong dili maayo nga binuhatan . 

Follow-up project sa "KathDen" gitingoha

Human sa kalamposan sa  pelikulang Hello, Love, Again,  nanawagan ang fans nila ni Alden Richards ug Kathryn Bernardo nga unta makabaton og follow up project ang maong tandem.

Panghinaot nila nga mahatagan kini og katumanan pinaagi sa laing koloborasyon sa GMA-7 ug ABS-CBN.

Gani usa sa uyon nga hatagan og follow up project ang  tandem  nila ni Kathryn ug Alden  mao ang senior vice-president sa GMA Network nga si Atty. Annette Gozon-Valdes. 

Isyu sa 'utang' gihimakak ni Vice

Giklaro ni  Vice Ganda nga  wala'y utang ang It's Showtime sa GMA Network.

Sa live episode sa It's Showtime  sa niaging adlaw , nahisgotan ang maong butang. 

Gibutyag sa komedyanteng TV host nga  duna'y igong budget ang maong noontime show . "Let's claim it na umaasenso tayo.At hindi totoong may utang ang It's Showtime sa GMA,'   matud pa ni Vice .

Una na nga nitumaw ang hungihong nga kutob nalang karong buwana ang pag-ere sa  It's Showtime sa GMA-7, apan suma pa sa  laing taho, giingong nagpadayon pa ang negosasyon sa maong butang. 

Popularidad sa "BISAN PA" sa WetSlipperz nagpabilin

Padayon nga naglawig ang banda nga WetSlipperz  nga  maoy orihinal nga nagpasikat sa awit nga  "Bisan Pa".

" Bisan pa ug may la-in ka na karon.Ikaw lang gihapon ang higugma-on.Bisan pa ug kasakit lang ang ma-angkon.

Basta malipay ka ang tanan akong dawaton," tipik sa linya sa "Bisan Pa" nga nakatatak og maayo sa ilang fans.

Sa interview  sa Banat News Hugyaw  sa bokalista sa grupo nga si Godjay Gorre  ug sa  nagdala sa back up vocals ug bass guitar sa maong banda nga si Emman La Victoria, dako ang ilang pasalamat sa padayon nga pagsuporta sa katawhan sa maong awit bisan paman sa kadugay na niini.

Matud pa nila  nga ang banda nga  WetSlipperz kay na-establisar niadtong 2000 ug ubay-ubay na ka mga miyembro ang nangagi sa banda  ug gihatagan gyud nila kini og bili sanglit kabahin man kini sa kalamposan sa grupo .

Saysay pa nila nga  nabuhat ang "Bisan Pa " kay 2004 ug gi-release niadtong 2005.

Ang original members sa banda kay naglangkob sa  mag-igsuon nga sila Godfrey (lead guitar), Godjay (frontman), ug Godace (bass), uban sa ilang suod nga mga higala nga sila si Niño (guitar) ug Axel (drums).

Dunay higayon nga nahimamat sa grupo ang tawo nga ginganlan og Arnel  nga maoy gisangpit  nga mobuhat og awit alang sa napakyas nga relasyon.

"One time, ang drummer namo nga si Axel nagdala og amigo nga si Arnel, nga maayo kaayo mo-compose og kanta. Niadtong panahona, bag-o lang ko nagbulag sa akong high school ug college sweetheart. Mao to, nagkaistorya mi ni Arnel, ug giingnan nako siya nga kung mahimo ba niya ko buhatan og kanta nga ang tema kay "broken," matud pa ni Godjay.

Gipadungog  dayon ni Arnel kang Godjay ang sample sa kanta gamit ang acoustic guitar.

"Nindot kaayo, mao nga giimbitar nako siya nga moapil sa among banda aron naa mi tig-sulat og kanta. Pero nibalibad siya kay giatiman niya  ang iyang trabaho ug pamilya," dugang pa ni Godjay .

Gihatag ni Arnel  ang gitagik niini nga awit ngadto sa grupo  ug  gi-arrange dayon ni Godjay .

 "Gihimo ang mga bagsakan, stanza, bridge, unsay beat sa drums, ug asa ibutang ang adlib. Didto nagsugod nga nailado ang Wetslipperz. Samot nga ni-boom ang banda pag-release sa kanta, ug after a year, naka-dawat dayon kini og 3 awards gikan sa M.O.R. ABS-CBN Cebu," pagbalik-lantaw ni Godjay.

Samtang gibutyag ni  Emman nga nagsagunson dayon ang sikat nga mga awit sa WetSlipperz nga sama sa  "Pangandoy," "L.U.Y. (Langit ug Yuta)," "Mapul-anon," ug "Gugmang Nagpaluya."

Aminado si Emman nga dunay nitumaw nga isyu kaniadto nga nikuwestyon kun kinsa gyud ang orihinal nga artist sa "Bisan Pa"  ,apan wala  sila nagpaapekto niini .

 "Naay uban nasuko kay wala daw gi-mention o gihatagan ug credit si Arnel, ang original nga composer.Actually, sobra kaayo namo ang pagpasalamat kang Arnel," ni Emman pa .

Gipaneguro sa WetSlipperz ang paghatag og kinabuhi sa kanta pinaagi sa ilang  dedikasyon ug kasensiro sa pagpadangat og nindot nga  musika.

Kauban nila ni Godjay ug Emman sa maong banda kay sila si Venz Aba (guitar) ug Adrianne Yu (drums).