Singsing ni Gabbi giintriga

CEBU, Philippines — Giintriga  ang usa sa mga  gisul-ob nga singsing ni Gabbi Garcia ug pipila sa iyang fans ang nagduda nga engagement ring kini.

Kahinumdoman nga nag-post si Gabbi sa hulagway nila ni Khalil Ramos ug makita ang nagpahipi niya nga kamot  nga dunay singsing.

Gilimod sa aktres ang maong  taho ug gitataw niya  nga hinatag  sa iyang inahan ang maong singsing.

Gipasalig hinoun ni Gabbi ngadto sa iyang fans nga mosulti ra siya kun maabot ang higayon  nga ma-engaged na sila sa iyang boyfriend nga si Khalil .

"GUYZZZZ it's a ring from my mom. Afaik (as far as I know), engagement rings should be on the left hand! It's my right hand  guyshhh . Relax babes you'll know promise," tubag pa ni Gabbi.

Sanya ug David bida sa pelikula

Niulbo karon ang taho nga posibleng sila si Sanya Lopez ug David Licauco ang mga bida sa pelikulang Barkadahan ng Mga Makasalanan . Nasayran nga mag-partner ang GMA Pictures ug kanhi gobernador sa Ilocos Sur nga si Chavit Singson sa pagpaluyo sa maong movie project.

Kabubut-on ni Liza

Nagmalaumon si James Reid alang sa maayong dagan sa career ni Liza Soberano didto sa Amerika. Bisan pa man nga dili na ang Careless ni James ang naghupot sa karera ni Liza , bukas gihapon  ang pultahan niini kun pananglitan mosangpit kanila ang aktres . Gibutyag ni James nga si Liza mismo ang ni-request nga putlon ang kontrata niini sa Careless Management.

MYX VJ Search 2024

Pormal na nga gibuksan  ang auditions sa MYX VJ Search 2024. Alang sa gustong mosalmot niini, mo- register online pinaagi sa myx.global/vjsearch ug i- upload ang self-introductory video ug isaysay kun nganong makiangayon kini nga mahimong MYX VJ. Ang pagpa-register kay kutob karong Oktubre 15, 2024 , 11:59 pm. “This generation is about being authentic, and that is the primary thing we will be looking for. You don’t have to look or speak a certain way, as long as you are authentic and a fan of music. We are excited to see the next batch of VJs who will join us,” suma pa ni ABS-CBN Global managing director Maribel Hernaez.

Jodi pasok sa horror movie

Si Jodi Sta. Maria ang bida sa umaabot nga horror movie sa Regal Films  nga nag-ulohan og Untold.

Gikatahong duha ka mga karakter ang pagadalhon ni Jodi sa maong pelikula..

Gipakita napud sa Regal Films sa niaging adlaw ang teaser niini.

Kahinumdoman  nga   si Jodi pud ang bida  sa  horror movie nga  Clarita niadtong 2019.

'Amakabogera' dunay english version 

Malipayong gipahibalo sa Kapamilya singer – actress nga si Maymay Entrata nga dunay umaabot nga  English version ang  hit song niya nga   'AMAKABOGERA' ug madungog na kini sa nagkadaiyang  music streaming platforms sa dili madugay.

Kahinumdoman nga puwerting sikata  ang karaang version sa maong awit     nga nakalangkat na og nine million streams sa  Spotify sukad sa pag-release niini nadtong  2021.

 “We’re releasing po the ‘AMAKABOGERA’ English Version dropping by end of the month. The original version is a song that’s so important to me as it talks about self-love, self confidence, embracing our own beauty and flaws, and we wanted the message to reach an even wider audience with this version po,” suma pa ni Maymay.

Gawas sa  English version sa maong awit , duna pud siya’y laing  idalit   alang sa iyang fans.

 “I just wanted to share po a special note with all of you, we’re preparing a lot of new music for you and I’m so excited for what’s to come po talaga,” dugang pa niya. 

Gerald gipasidunggan sa Kagamhanan sa GenSan

Nakadawat og rekognasyon gikan sa  Kagamhanan sa General Santos City ang Kapamilya actor   nga si Gerald Anderson  gumikan sa kontribusyon niini sa  rescue operations alang   sa  mga naapektohan sa kalamidad sa nasud.

Nangulo sa seremonya  mao ang mayor sa  General Santos City nga si  Lorelie Geronimo Pacquiao .

"Another round of salutes and applause to #GeraldAnderson, whose unwavering commitment and admirable heroism as Auxiliary Commander was recognized by the City Government of General Santos for his brave acts of heroism amid Super Typhoon Carina last July 2024," social media post sa Star Magic .

Kahinumdoman nga sa niaging buwan,   nakadawat pud og medal si Gerald gikan sa Philippine Coast Guard gumikan sa susama gihapon nga rason.

Mister and Miss Cebu Press Freedom 2024

Mosikad na karong  adlawa  ang  koronasyon sa Mister and Miss Cebu Press Freedom 2024  nga pagahimoon diha sa NUSTAR Resort .

Nasayran nga  ang maong indigay  kay kabahin sa  nagbaha   nga mga kalihokan   alang sa selebrasyon sa Cebu Press Freedom  Week.

Ang official candidates sa maong indigay kay naglangkob nila ni  Iris Hazel Mascardo ug Andrew Matthew Ortoño (The Freeman) , Claudine Flores ug JP Seblos ( SunStar Cebu), Elikha Joy Janaban ug Remart Pogoy ( Kapisanan ng mga Brodkaster ng Pilipinas - Cebu Chapter), ug  Queenie Joligon ug  Arvin Buzon ( MyTV Cebu).

Naandan na ang nga ang mga miyembro sa Cebu Entertainment Group (E-Group) ang magdala sa production sa   Mister and Miss Cebu Press Freedom inubanan sa tinahod nga sponsors.