Lavender Fields nag-una sa Netflix PH

CEBU, Philippines — Nahimutang sa No. 1 ang Kapamilya series nga  Lavender Fields sa listahan sa Top 10 TV Shows sa  Netflix Philippines kagahapon, Septiyembre 2, 2024, Lunes. Ang  Lavender Fields kay gibidahan nila ni Jodi Sta. Maria, Jericho Rosales, ug Janine Gutierrez.

Nalandig sa ikaupat nga puwesto ang Kapuso series nga  Pulang Araw nga gibitoonan nila ni Alden Richards, Barbie Forteza, Sanya Lopez, David Licauco, ug Dennis Trillo. 

Mobisita sa nasud

Gikatakdang motikang dinhi sa Pilipinas sa tunga-tungang bahin karong buwana ang grupong KATSEYE. Nalakip sa maong grupo ang Pinay performer  nga si Sophia Laforteza. Nasayran nga mobisita karong buwana  sa nagkalain-laing dapit sa Asya ang KATSEYE. Ang maong grupo kay gihuptan sa   HYBE ug Geffen Records sa  Universal Music. Gilangkoban ang KATSEYE nila ni  Sophia, Manon, Daniela, Lara, Megan, ug Yoonchae.

Mi-resign sa show ni Willie

Niundang isip usa sa mga  co-hosts ni  Willie Revillame sa   Wil To Win sa TV5  ang singer-actor na si MJ Cayabyab.Usa ug tunga ka  buwan pa lang sa ere ang nahisgotan nga programa.  Sa dihang gipangutana si MJ kun unsay  hinungdan sa pagbiya niya sa maong programa ,nitubag kini og ,"personal reason."

Tangtangonon

Sila si  Fyang, Kolette, ug ang two-in-one housemates nga sila si Joli ug Gwen maoy mga nominado alang sa sunod nga eviction night  sa  "Pinoy Big Brother Gen 11". Si Fyang maoy nakaangkon og labing daghan nga botos alang sa pagkalakip niya sa maong listahan.

Ronnie nakadawat og award sa Philippine Army

Nakadawat og rekognasyon ang  singer nga si Ronnie Liang sa Philippine Army  gumikan sa pagpakita niya og pagmahal sa nasud  ug ang pagboluntaryo  sa nagkadaiyang kalihokan alang sa pagtabang sa komunidad.

Nitambong si Ronnie sa  niaging gabii sa selebrasyon sa  41st founding anniversary sa reserve command sa Philippine Army sa Camp Riego De Dios  sa Cavite ug dinhi niya nadawat ang  special award.

“Always remember that even helping out with the smallest tasks can make a real difference to the lives of people in need. Nagpapasalamat ako sa Philippine Army para sa karangalang ito,” saysay pa ni Ronnie .

Pipila sa nabuhat sa singer mao ang pag-promote sa  Reserve Officers' Training Corps (ROTC),  pag-rescue sa mga naapektohan sa Bagyong Carina, ug uban pa . 

Usa ka dekada na sa showbiz

Gisaulog ni Gabbi Garcia ang iyang  10th year sa showbiz industry.

Suma pa sa aktres nga nakita gyud niya ang paglambo sa iyang career busa dako gyud ang iyang pasalamat ngadto sa mga nakatampo niini.

 "Being here is such a gift. It really is a gift to be able to inspire people, to have an impact. They keep me going all the time," saysay pa ni  Gabbi ngadto sa GMA News .

BarDa dunay special project

Nanglarga sa Thailand ang Kapuso stars nga sila si  Barbie Forteza ug David Licauco alang sa usa ka special project. Wala pa gidetalye sa duha ang klase sa proyekto nga ilang pagabuhaton sa maong dapit.

Nagpadayon gihapon ang tandem nila ni Barbie ug David sa telebisyon pinaagi sa Pulang Araw sa GMA-7.

Pinay nakadaog sa film festival sa Taiwan

Ang Pinay actress nga si  Rebecca Chuaunsu maoy napili nga  Best Actress sa bag-ohay lang nga 2024 Wu Wei Taipei International Film Festival. Nataypan ang maayong pag-arte ni Rebecca  sa pelikulang  "Her Locket" .

Ang awarding ceremony kay gipahigayon sa Westar Theater sa Ximeding , Taipei, Taiwan.

"Magandang gabi isa inyong lahat. I'm an actress and producer from the Philippines. First, thank you, Direk Njel, Ms. Jam, the jurors of the Wu Wei Taipei International Films Festival. You know, when I was a child and a teenager, I used to hold a Taiwan passport. Yes! Until the day before I got married, I waited for 11 years… for then President (Ferdinand) Marcos to declare us as naturalized Filipinos," matud pa niya .

Mao na kini ang iyang ikaduha nga  Best Actress trophy.

 Nakadaog siya sa susama gihapon nga award  sa 2023 Festival International du Film Transsaharien de Zagora didto sa Morocco.