Locker ni Kobe Bryant napalit sa presyo nga P167.6 milyon

CEBU, Philippines — Ang locker nga gigamit ni Kobe Byrant sa kinadak-ang bahin sa mabulokon niining karera sa NBA nahalin sa makabungog nga kantidad.

Atol sa usa ka subasta nga gipasiugdahan sa Sotheby's didto sa New York kagahapong adlawa, napalit sa usa ka Amerikanong kolektor ang maong bililhon nga handumanan ni anhing Kobe sa kantidad nga $2.9 million kon P167.6 million.

Doble kini sa nahaunang gitagna nga presyo alang ning Staples Center locker nga gigamit ni Bryant niadtong  nagduwa pa siya sa Los Angeles Lakers.

Si Bryant, nga 18-time NBA All-Star guard, namatay niadtong 2020 sa makapakurat nga helicopter crash sa edad nga 41 anyos.

Miduwa siya sa tibuok niyang 20 ka tuig nga karera sa NBA gikan niadtong 1996 ngadto sa 2016 uban sa Lakers.

Sa dihang gi-renovate ang Staples Center niadtong 2018, ang maintenance worker misalbar sa locker ni Kobe aron dili kiin maguba.

"Today's price highlights not only Kobe's enduring legacy but also the exceptional nature of this unique item," matud pa niBrahm Wachter sa Sotheby's.

Gawas sa locker ni Kobe, gi-auction sab ang uban pang mga memorabilia gikan nilang Michael Jordan,  Reggie Jackson, ug Stephen Curry.