Avril ug Ellie nahimamat  ni Heart

CEBU, Philippines — Nahimamat  gyud ni Heart Evangelista sa personal atol sa pagtambong niya sa  Paris Fashion Week  ang mga sikat nga personalidad nga sila si  Avril Lavigne ug Ellie Goulding.

Sa nigawas nga mga hulagway sa social media, nakatupad gyud ni Heart ang nahisgotan nga singers.

Si Avril ang nagkanta sa “Sk8er Boi,” “Complicated,” ug  “When You’re Gone,” samtang si Ellie  maoy nagpasikat sa  “Burn” ug “Love Me Like You Do”. 

Isyu sa komunidad tukion sa "Hook Up"

Mahitabo na ugma, Hunyo  28 , 2024   ang labing una  nga public reading sa bag-ong musical nga  nag-ulohan og "Hook Up" nga gimugna sa  songwriter  nga si Jude Gitamondoc.

Sa pakighinabi ni Jude dinhi sa Banat News Hugyaw,  pagahimoon ang  maong kalihokan  sa  Quest Hotel  alang sa mga espesyal nila nga dinapit, samtang mahitabo sa katapusang bahin sa  Nobyembre ang full production niini nga maatol usab sa kasaulogan sa World AIDS Day.

Ipakita  sa maong musical ang mga hagit nga gisagobang sa LGBTQIA+ community.

Nagkanayon si Direk Jude nga  dunay dakong kalahian ang “Hook Up" sa nangagi niya nga mga proyekto.

Nailhan siya  kaniadto sa pagmugna og mga musical nga dunay rehiliyosong konsepto, apan niining higayona, ang  pagsabwag sa pipila ka mga isyu sa komunidad ang iyang idalit.

Ang “Hook Up” kay usa ka musical comedy nga naghisgot sa istorya ni   Tim, o  TimidTim, usa ka batan-ong lalaki  nga nangita og hinigugma  pinaagi sa  gay dating app nga  Hooked. Nahimamat niya ang  mysterious character nga ginganlan og IAmAnonymous, nga ulahi na nga nahibaw-an nga dunay sakit nga  HIV. Ang musical play kay nagtuki sa pipila ka mga isyu  kalabot sa  dating sa  digital era, ingong man usab ang pagpatuman sa  safe sex, ug diskriminasyon  nga nasinati sa mga tawong dunay  HIV.

Gipaluyohan  usab sa Cebu City-based independent record label nga Kadasig ang maong musical play isip pagtamod sa Cebu Pride Month  celebration.

Gilangkoban kini sa  Cebuano performers nga sila si Jan Echavarria isip  TimidTim ug Ralph Mallapre isip  IAmAnonymous. Nalakip usab niini sila si  Gabriel Gomez, Joanna Modesto, Shim Dagatan, Jaggy Gomez, Fritz Pepino, Joer Gallur, Les Paul Pineda,ug  Cyril Cabahug.

Ka-partner sa Kadasig alang sa pagpahigayon sa maong proyekto mao ang LoveYourself Cebu, Cebu Pride Movement, Quest Hotel & Conference Center, ug  Padayon Jud Foundation.

Gipasigarbo ni Direk Jude nga makamugna og mga proyekto nga nagtangag og mga importanteng mensahe nga angayan masayran sa publiko.

“Musical theatre has always been part of my life. I’ve been writing musicals since I was in high school. But this time, it hits different. This is the first time I’ve set out to write something very personal. And I know now why I’ve never tried. I feel so vulnerable! Not just for myself, but moreso, for my community. That's why I'm determined to do this staged reading. I know what I've written is a work in progress, and I want to involve the LGBTQ+ community and its allies in the process. I look forward to getting their valuable feedback and learning from this experience.” saysay pa ni Direk Jude.

Masaligon siya nga makadawat og  dakong suporta sa katawhan ang "Hook Up".

BINI nag-pamisa tungod sa kalamposan

Gipahigayon sa niaging adlaw ang thanksgiving mass alang nakab-ot nga kalamposan sa girl group nga BINI .

Si Father Tito Caluag ang nangulo sa santos nga misa  nga gitambongan sa tanang miyembro sa BINI, dancers, staff ug  ang team nga nagdumala kanila.

Nasayran nga dili na basta-basta ang popularidad sa maong grupo ug kanunay nga gidumogan ang ilang mga show sa nagkalain-laing dapit sa nasud. 

Extraordinary finale gipaabot

Ang kulbahinam  ug extraordinary finale maoy makita ugma sa viewers sa Kapuso primetime series nga "My Guardian Alien". Gibitoonan ang maong teleserye nila ni Queen Marian Rivera ,  Gabby Concepcion ,  Max Collins ,  Raphael Landicho ug  Gabby Eigenmann .

Malipayon ang mga bida sa maong teleserye gumikan sa mga positibong feedback  nga ilang nadawat sulod sa pipila ka buwan.

Dominic ug Kathryn giintriga

Hugtanong gihimakak sa aktor nga si  Dominic Roque ang niulbo nga intriga nga matud pa duna sila’y relasyon sa Kapamilya actress nga si  Kathryn Bernardo .Nag-post usab og hulagway ang aktor kauban si Kathryn kun diin nagdungan sila og ehersisyo. Sa  comment section sa iyang  post, gitataw ni Dominic nga giisip niya si Kathryn nga iyang igsoun.

Kalmado ra

Gibutyag  ni Eric Quizon  nga kalmado ra siya nga pagka-direktor ug dili siya manglabay og butang sa mga artista nga hilaw kaayo moarte.  Imbes nga kasab-an , iya kini nga tabangan  aron makat-on. Susihon usab  niya ang kapasidad niini. 

Mapungot sa mga kabit

Usa  si  Pokwang  sa mga tawo nga maglagot gyud og mga kabit. Suma pa sa komedyanteng aktres nga ma-karma ra gyud ang mga kabit gumikan kay dili maayo ang ilang gibuhat."Di sila matatahimik, masaya sila sandali lang pero tandaan may nawasak silang puso at masaya sanang pagsasama, dahil sa kalandian at tawag ng ka pokpokan di nila antala si KARMA BAD KARMA SOON!",” social media post sa aktres.