Senate Bill No. 2347 magdili sa advertisements bahin sa sugal

Gisang-at ni Senador Francis “Chiz” Escudero ang usa ka balaodnon nga nagtumong sa pagdili sa tanang matang sa anunsiyo ug sponsorship may kalabotan sa sugal.

Kini aron mapugngan ang sobra ug iresponsableng pagsugal ug mapanalipdan ang mga menor de edad ug uban pang delikadong sektor.

Ubos sa Senate Bill No. 2347, gidili ang mga advertisement sa sugal sa telebisyon, radyo, mantalaan, online ug social media platforms, lakip na ang paggamit og mga celebrity ug social media influencers sa pagpasiugda sa mga gambling services.

Matud ni Escudero, gisundog sa maong balaodnon ang pamaagi sa Republic Act No. 9211 o Tobacco Regulation Act of 2003, nga nagbutang og higpit nga mga limitasyon sa advertising sa sigarilyo aron mapanalipdan ang panglawas sa publiko.

Gipasabot sa senador nga sama sa industriya sa tabako, ang walay pugong nga promosyon sa sugal mahimong makaduso sa sobra ug mapintas nga pagpanugal, ilabina sa kabatan-onan.

Gisuportahan usab sa maong balaodnon ang pagbutang og responsible gambling advisories sa tanang gitugot nga komunikasyon sa mga gambling operator aron pahimangnoan ang publiko sa mga risgo sa compulsive gambling.

Matud pa usab ni Escudero ang bag-ong lakang sa Ad Standards Council (ASC) nga boluntaryong nagpagawas og self-regulation circular nga nagdili sa paggamit sa gambling imagery ug paraphernalia sa tanang media platforms.

Bisan pa sa dakong kontribusyon sa industriya sa sugal sa kita sa gobyerno, trabaho ug turismo, giingon ni Escudero nga nagkadaghan usab ang mga advertisement, promosyon ug sponsorship nga mas organisado ug mas target ang publiko.

Sa explanatory note sa balaodnon, matod pa sa senador ang padayon nga pagtubo sa online ug digital gaming industry, diin miabot sa P396.13 bilyon ang gross gaming revenues sa industriya niadtong Fiscal Year 2025.

Matud ni Escudero, ang tumong sa maong balaodnon mao ang pagpalambo sa mas responsableng gaming environment, pagpanalipod sa mga menor de edad ug vulnerable sectors, ug pagpalig-on sa interes sa publiko. — /MEL (BANAT NEWS)