Haum sa pasigarbo

Akong pahalipay sa lokal nga kagamhanan sa lalawigan sa Sugbo sa malampuson nga Pasigarbo sa Sugbo 2024 nga gipahigayon sa Cebu City Sports Center sa dakbayan sa Sugbo niadtong adlaw nga Domingo.

Ako pod nga ipaabot ang akong pahalipay ngadto sa mga mananaug ug wala modaug sa lainlain nga kategoriya sa Pasigarbo tungod kay ang katuyoan sa maong pasundayag dili man gyod ang pagdaug kun dili ang pagpasundayag sa nagkalainlain nga kultura sa mga lungsod ug sakop nga mga siyudad sa lalawigan sa Sugbo.

Isugyot lang nako sa lokal nga lagamhanan sa lalawigan sa Sugbo nga sa sunod adto na ipahigayon sa lalawigan ang Pasigarbo.

Mas maayo nga ipadayon na ang naandan nga sa lalawigan sa Sugbo ipahigayon ang Pasigarbo aron dili mahikawan ang mga taga lalawigan sa pagtanaw sa maanindot nga pasundayag. Gawas pa niini, makatabang usab sa lokal nga turismo ug gagmay nga negosyante sa lungsod o siyudad diin adto ipahigayon ang Pasigarbo.

Wala ko mosupak sa pagpahigayon sa Pasigarbo sa Sugbo. Wala pod koy labot og nag-away si Mayor Mike Rama ug si Gobernador Gwen Garcia. Ang ako lang nga matabangan ang mga lokal nga kagamhanan sa mga lungsod ug siyudad sa lalawigan nga makaambit sa mga kaayohan nga mahatag sa Pasigarbo sama sa inprastraktura, turismo, ekonomiya ug kalingawan.

Kini ilabina sa inprastraktura tungod kay makatabang man ang lalawigan sa pagpatukod og entablado nga kapasundayagan ug pagpanindot sa dalan nga agian sa mga contengents.

Makaagni usab sa mga dumuduong sa pagbalik sa dapit diin gipahigayon ang Pasigarbo, busa makatabang kini sa lokal nga turismo sa dapit. Labaw usab nga matabangan niini ang mga gagmay nga negosyante ug moingganyo sa uban sa pagnegosyo bisan niana lamang adlawa.

Kay maayo ang pagkadala sa Pasigarbo sa Sugbo, ang akong pangagpas molanat kini og taas nga panahon nga posibleng ang tanan nga lungsod ug component city matuyok na sa pag-host niini.

Sa laing bahin, Congratulations.