Rehistrasyon sa posibleng mga benepisyaryo sa 4Ps nagpadayon

CEBU, Philippines — Padayon ang Department of Social Welfare and Development-7 (DSWD-7) sa rehistrasyon sa mga posibleng benepisyaryo ubos sa Sets 14D ug 14E sa Pantawid Pamilyang Pilipino Program (4Ps) sa tibuok Central Visayas ning buwan sa Hulyo.

Mokabat sa 57,015 ka pamilya ang gitumong nga marehistro, lakip ang 12,408 sa Bohol ug 44,607 sa Sugbo. Kini sila ang posibleng mopuli sa mga benepisyaryo nga migawas o migraduwar na sa programa.

Matod ni DSWD-7 Regional Director Shalaine Marie Lucero, kabahin kini sa padayon nga paningkamot sa gobyerno sa paghatag og tabang sa mga kwalipikadong kabos nga pamilya pinaagi sa patas ug datos nga gibasehang proseso sa pagpili ubos sa Community-Based Monitoring System (CBMS).

Atol sa rehistrasyon, beripikahon ang mga dokumento ug datos sa panimalay aron matino ang kwalipikasyon sa mga aplikante. Moagi usab sila sa oryentasyon ug Oath of Commitment.

Gipahinumdom sa DSWD-7 nga ang pag-apil sa listahan sa rehistrasyon dili garantiya nga madawat dayon sa 4Ps, tungod kay kinahanglan gihapon nilang makompleto ang tanang proseso ug mga kinahanglanon sa programa.

Ang rehistrasyon gipatuman ubos sa HAPSAY o Harmonized Actions and Processes for Swift, Accountable Yield, nga pamaagi sa DSWD-7 aron mapaspasan ang pagdawat sa bag-ong mga benepisyaryo ug masiguro nga ang ayuda makaabot sa mga kwalipikadong kabos ug near-poor nga pamilya. MEL BANAT NEWS