Nanghasi nadakpan, nakuhaan og armas ug shabu
CEBU, Philippines — Armadong lalaki nga nanghasi nadakpan ug nakuhaan sab og gidudahang ilegal nga droga atol sa usa ka operasyon sa Barangay Mambaling, Cebu City niadtong gabii sa Hunyo 11, 2026.
Ubos sa direktang pagdumala ni Police Captain Arnel S. Ancheta, nakadawat ang Police Station 11 og report gikan sa usa ka concerned citizen mahitungod sa usa ka armadong tawo sa maong barangay.
Base sa nadawat nga impormasyon, diha-diha nga miresponde ang mga operatiba ngadto sa lugar hangtud nga ilang nakit-an ang maong tawo nga nagwara-wara og armas.
Sa dihang gipangayoan siya sa mga polis sa mga legal nga dokumento sa armas, wala siyay napakita hiungdan nga siya gidakop. Pasakaan siya og kasong paglapas sa Republic Act No. 10591 o ang Comprehensive Firearms and Ammunition Regulation Act.
Atol sa pagdakop kaniya, nakompisar usab sa mga polis ang duha ka medium-sized heat-sealed transparent plastic sachets nga adunay sulod nga gidudahang shabu nga gibanabanaang kantidad nga P54,400.
Matud sa Cebu City Police Office (CCPO) sa ilang Facebook post nga ang malampusong pagdakop sa suspek ug ang pagsakmit sa armas nga walay lisensya ug gidudahang mga ilegal nga droga nakapugong sa posibleng hulga sa kaluwasan sa publiko ug sa posibleng pagbuhat og bayolente o drug-related nga mga krimen sa komunidad.
- Latest
