“Jacket”, bag-ong single ni Jericho Streegan

CEBU, Philippines — Gi-release na kagahapon sa Cebuano singer-songwriter nga si Jericho Streegan ang iyang bag-ong single nga “Jacket”.  Sa unang episode sa iyang docuseries nga “Malabo,” nga nag-ulohan og “What Happens When You Finally Bet on Yourself?,” gipaambit ni Jericho ang iyang desisyon nga molarga sa kaulohan ug ipadayon ang iyang pangandoy sa musika.

Ang “Jacket” kay usa ka indie-pop nga kanta nga naghimo sa usa ka ordinaryong jacket nga simbolo sa pangandoy ug kamingaw. Mahimong kabahin kini sa umaabot niyang EP nga “Malabo” ubos sa Tarsier Records.

Nagsugod ang interes ni Jericho sa musika sa edad nga tres anyos, mokanta siya sa mga kalihokan sa eskwelahan ug maminaw sa koleksiyon sa mga kanta sa iyang inahan.

Nailhan ang iyang talento sa pagsulat og kanta niadtong 2020 human siya nidaog sa kompetisyon sa pagsulat og Bisaya song nga Dasig Bisaya pinaagi sa iyang orihinal nga komposisyon nga “Unta.”

Lakip sa iyang mga awit nga gipalanog kaniadto ubos sa Tarsier Records mao ang “Back To You,” “Shine” ug “Unsa’y Gibati.”

“For the longest time, I have known that I want music to be my life.  I want to wake up and write. I want to wake up and produce music, record, and play live shows,” suma pa ni Jericho .

Madungog na karon sa nagkadaiyang music streaming platforms ang “Jacket.” 

Anton ug chanty sa “Barangay love Stories”

Usa ka istorya kabahin sa panaghigalaay ug gugma ang idalit sa Barangay Love Stories, nga gidumala ni Papa Dudut, karong alas 4 sa hapon , Oktubre 24 sa GMA Network .

Hisgotan sa maong episode ang istorya ni PJ (Anton Vinzon), usa ka batan-ong lalaki nga sekreto nga nahigugma sa iyang suod nga higala nga si Ericka (Chanty Videla).

Nausab ang dagan sa ilang relasyon human madiskobrehan ni Ericka nga nangabit ang iyang uyab nga si John Paul (Mad Ramos). Aron mapanalipdan si Ericka, mitanyag si PJ nga magpakaaron-ingnon nga iyang uyab.