Teaser sa “Amir”,  nakalangkat og 4 million views

CEBU, Philippines — Nakapukaw sa interes sa mga  tawo ang official  teaser sa pelikulang “Amir” nga nikulit  na og kapin sa 4 million views online.

Ang “Amir”  kay  usa sa mga entry  sa ika-52 nga Metro Manila Film Festival (MMFF) ug ipasalida sa mga sinehan sa tibuok nasud karong Disyembre 25.

Gibidahan kini nila Dennis Trillo, Glaiza de Castro,  Will Ashley ug  ang  child star nga si  Argus Aspiras .

Si Zig Dulay ang direktor sa maong fantasy -drama film nga gipaluyohan sa GMA Pictures , GMA Public Affairs  ug Brightburn Entertainment. 

Xyriel, Karina, Kaori ug Elyson, mga bida sa “True Manila Encounters”

Maghatag og kahadlok ug kulba sa mga tumatan-aw  sila Xyriel Manabat, Karina Bautista, Kaori Oinuma ug Elyson de Dios sa bag-ong horror anthology sa iWant nga “True Manila Encounters.”

Magsugod ang streaming sa maong series  karong Oktubre 29 sa iWant. Gihimo kini sa award-winning production company nga CreaZion Studios ug naghisgot sa makahahadlok nga mga tinuod nga kasinatian nga may kalabotan sa supernatural nga mga panghitabo.

Sa unang episode nga “Undressed,” magtinabangay sila Xyriel ug Karina sa pag-atubang sa usa ka mapanimaslong espirito nga nalambigit sa usa ka sinina nga gipalit sa ukay-ukay.

Si Rae Red, direktor sa mga pelikulang “Birdshot,” “Si Chedeng at Si Apple” ug “Eerie,” maoy modumala sa maong episode.

Samtang, mga bida  usab sa sunod nga episode nga “Occupant” sila Kaori ug Elyson. Nagtuyok ang istorya sa usa ka magtiayon nga adunay layo nga relasyon tungod sa trabaho, apan nahimong makahadlok ang ilang kahimtang tungod sa usa ka dili maayong espirito  Si Dodo Dayao, nga nailhan sa mga pelikulang “Uninvited,” “Midnight in a Perfect World” ug “Violator,” maoy direktor sa maong episode.

Makita  ang “Undressed” karong Oktubre 29, samtang ang “Occupant” ipasalida karong Nobyembre 5 sa iWant .

OH! caraga, miawit sa bisaya version sa “ Where Dreams Fly”

Gipasigarbo gyud og maayo sa  OPM band nga Oh! Caraga ang katahom sa musikang Bisaya pinaagi sa ilang pag-awit sa Bisaya version sa “Where Dreams Fly,” ang original soundtrack sa ika-30 nga anibersaryo sa Cebu Pacific.

Ang music video naghatag og pasidungog sa Sugbo, diin nagsugod ang kasaysayan sa maong airline , ug sa mga pangandoy, pagkamamugnaon, ug pagkamalamboon  sa pagnegosyo sa mga Sugboanon nga padayon nga naghatag og inspirasyon sa matag henerasyon sa mga Pinoy.

Suma pa sa  Cebu Pacific, ang maong awit sa Oh! Caraga naghatag og bag-ong kusog sa ilang anibersaryo nga awit ug swak  sa mga biyahero pinaagi sa pinulongang doul  sa ilang kasingkasing.