Nagluib ang uyab?

Dear Tito Miguel,

Maayong adlaw  kanimo. Tawga lang ko sa pangalan nga Mile, 25 anyos, taga Mandaue City ug adunay uyab nga  ginganlan og NJ ug  upat ka tuig na ang among relasyon. Malipayon man unta mi sa among relasyon, apan karon murag  nausab man . Daghan na kaayo ko’g nadunggan nga intriga bahin sa akong uyab. Ingon sila nga naa na kuno siyay laing babaye ug nakit-an  pa gani kuno sila nga kuyog usahay.  Nasakitan ko sa ilang mga gisulti, apan wala koy lig-on nga ebidensya aron motoo dayon.

Sa matag higayon nga akong pangutan-on si NJ, mo-deny gyud siya . Moingon siya nga mga istorya lang kuno kana sa mga tawo nga gustong moguba  sa among relasyon. Tungod kay wala man koy ikapakita nga pruweba, dili pud ko makiglalis pag-ayo kaniya. Usahay makabantay ko nga dili na siya parehas kaniadto. Usahay dili na motubag sa akong mga mensahe sulod sa pila ka oras, ug mas gitago na niya ang iyang cellphone. Apan usahay sweet , maong maglibog ko kon tinuod ba ang akong gibati o nag-overthink lang ba ko.

Tito Miguel , unsa man akong buhaton? Padayon ba kong mosalig kaniya hangtod adunay klarong ebidensya, o paminawon na nako ang akong instinct nga adunay dili sakto? Unsaon  man pag-ila kung tinuod ba nga adunay lain ang usa ka tawo kung wala kay ikapakita nga pruweba? — Mile 

* * *

Mile,

Lagmit tinuod ang imong mga nadunggan. Unsa may motibo sa mga nisumbong kanimo nga dauton imong uyab? Wala di ba. Buot pasabot wala sila magtumo tumo’g istorya. Kun usa ra nisulti nimo, puede pa ka magduda basin nasayop ra siya. Pero’g daghan na, angay na ka magduhaduha.

Natural nga molimod siya. Wala’y cheater nga mo-angkon diha diha dayon. Molimod pa man gani maski nasakpan na. Kun nausab na iyang lihok, timailhan na kana. Kun iya nang gitago iyang cell phone, buot pasabot naa diha ang ebidensiya. Ka’y kun wala siya’y gitago, mahimo man gani niya ihatag iyang cell phone kanimo apil pa ang password. Suwayi’g huwam sa iyang cell phone, tan-awa ang reaksyon. Kun magduha duha ug di mahimutang samtang nigamit ka, tinuod imong duda.

Kun usahay sweet siya, ayaw palingla. Lagmit nakunsensiya ra na sa iyang gibuhat kanimo. Dili kana sinsero, igo ra ka giulo-ulohan. Kun gusto gyud ka makahibalo sa kamatuoran, ayaw pangutana. Kay kun imong ipakita nga nagduda ka, samot na motago. Pero’g imong ipakita nga salig ka niya, diha na mokumpyansa.

Ang kamatuoran mopakita ra na’g iyaha sa panahon ug lugar nga wa nimo damha. Kabantay ka’g naa kay butang nga pangitaon, apan di gyud nimo makit-an maski kapila na ka nangukay? Pero’g di na nimo pangitaon, kalit na mopakita kanimo. Sama ra sab sa kamatuoran kun gibudhian ba ka sa imong uyab. Ayaw pangutana, ayaw pangitaa, usa ka adlaw makugang na lang ka, ang kamatuoran mismo maoy monawong kanimo. -Tito Miguel

Magpatambag ka? Ipada kang Tito Miguel 0991-318-9366