UV Lancers 5-0 na

CEBU, Philippines — Ang University of the Visayas (UV) Green Lancers milampaso sa University of the Philippines (UP) Cebu Fighting Maroons, 91-59, aron pagpabiling way pilde sa Cebu Schools Athletic Foundation, Inc. (CESAFI) Season 24 basketball tournament didto sa Cebu Coliseum niadtong weekend.

Si reigning MVP Kent Ivo Salarda mikadlit og double-double nga 18 puntos ug 12 ka rebounds nga iyang gipalamanan og duha ka assists ug duha ka steals sa dihang ang Lancers miangkon sa solong liderato sa college division bitbit ang perpektong 5-0 nga baraha.

Sila si AJ Sacayan ug Raul Gentallan midugang og 15 puntos matag usa alang sa Lancers, nga misirit ngadto sa 49-30 nga bentaha sa halftime nga ila pang giinat ngadto sa 36 puntos,  86-50, sa usa ka dominante kaayong salida.

Si JZ Dizon mihipos og 15 puntos alang sa Fighting Maroons, nga nakatilaw sa ikaupat nilang sagunson nga pilde human sa madaogon nilang sinugdanan.

Sa high school level, ang Cebu Eastern College (CEC) Dragons namawi sa miagi nilang kaparotan ug gipahimungtan sa ilang kapungot ang Benedicto College (BC) Baby Cheetahs nga ilang gilat-an og 31 puntos, 68-37.

Si Louie Jay Estorba mipupo og 13 puntos ug tulo ka rebounds samtang si Kenneth  Robert Fuller miharos og 11 puntos, walo ka rebounds, tulo ka assists, tulo ka steals ug usa ka block alang sa Dragons nga nag-inusara karon sa ikaupat nga puwesto uban ang 6-2 rekord.

Wala na molingi pa ang Dragons sukad sila miestablisar og sayong 22-8 nga labaw nga ilang gipaburot ngadto sa 50-19 sa tunga-tungang bahin sa ikatulong kuwarter.

Sila si Jacis Abraham Bensi ug Kyle Andre Nalisa nagkumbinar og 22 puntos, 13 ka rebounds, tulo ka assists ug tulo ka steals apan way nahimo gumikan kay ang Baby Cheetahs nahagsa sa 1-7.

Sa laing resulta, si Dan Mitchell Ferraren mipabuto og 27 puntos samtang si Wade Adam Luche mibubo og 25 puntos ug siyam ka rebounds aron pangulohan ang University of Cebu Lapu-Lapu and Mandaue (UCLM) ngadto sa 87-81 nga kadaogan sud sa overtime batok sa University of Southern Philippines Foundation (USPF) Baby Panthers.

Si Prince Juver Neil Mallorca mitampo og 10 puntos ug 11 ka rebounds alang sa UCLM, nga nagkupot na karon og 3-5 nga marka.

Ang Baby Panthers natagak sa 3-3 bisan pa man sa 30 puntos nga eksplosyon ni Fritz John Cary Gonzales.