Ika-10th anniversary sa 2016 South China Sea Arbitral Award gisaulog

CEBU, Philippines — Ang Philippine Coast Guard District Central Visayas (CGDCV) kauban ang mga barkong adunay bandera sa Pilipinas, Cebu Port Authority (CPA) ug uban pa’ng mga miyembro sa maritime community niapil sa nasudnong “Tunog ng Karagatan” nga kalihokan kagahapon aron sa pagsaulog sa ika-10 nga anibersaryo sa 2016 South China Sea Arbitral Award.

Ang mga barkong niapil sa port of Cebu nipatingog sa ilang mga busina og 10 ka beses sulod sa usa ka minuto isip simbolikong pagpakita sa panaghiusa ug suporta sa mga katungod sa Pilipinas sa kadagatan ubos sa international; nga balaod.

Ang kalihokan adunay tema nga “A Decade of Law, Not Force”, nga nagpasiugda pag-usab sa pasalig sa nasud alang sa soberaniya, kalinaw ug usa ka international nga kahapsay nga gibase sa balaod usa ka dekada human sa desisyon.

Giawhag usab ang mga barko nga magsul-ob og full colors ug ipataas ang bandera sa Pilipinas.

Ang arbitral ruling nga gipagawas niadtong Hulyo 12, 2016 sa usa ka tribunal nga gitukod ubos sa Annex VII sa United Nations Convention on the Law of the Sea (UNCLOS) nipabor sa mga katungod sa Pilipinas sa pipila ka bahin sa West Philippine Sea, niila sa soberanong katungod sa nasud sulod sa 200-nautical-mile Exclusive Economic Zone ug nagpamatuod sa tradisyonal nga katungod sa pagpangisda sa mga Pilipinong mangingisda sa katubigan sa Bajo de Masinloc.

Ang maong desisyon giisip nga pinal ug legal nga nagbugkos ubos sa UNCLOS bisan pa sa wala pag-apil sa China sa arbitral proceedings.

Samtang, si Senador Risa Hontiveros nanawagan sa mga Pilipino nga hinumdoman ug panalipdan ang legal nga kadaogan sa nasud pinaagi sa 2016 Hague Arbitral Award samtang gisaulog ang ika-10 nga anibersaryo sa maong desisyon niadtong Sabado.

Si Hontiveros nipadayag sa iyang kabalaka kabahin sa bag-ohay nga mga pamahayag sa pipila ka Chinese academics nga nagkanayon nga sakop sa China ang Batanes nga iyang gihulagway isip dakong pagpasipala sa mga Ivatan ug sa tanang Pilipino.

Matud ni Hontiveros nga ang maong mga pamahayag nagpakita kong unsa ka lawom ang pagkagamot sa propaganda sa China ngadto sa ilang kaugalingong katawhan.

Samtang, ang mga gobiyerno sa United States, Australia, Canada, Estonia, Germany, Italy, Japan, Latvia, Lithuania, New Zealand, Pilipinas, Romania, Slovenia ug United Kingdom nagpagawas og hiniusang pahayag niadtong Hulyo 12, 2026 nga nagpamatuod pag-usab nga ang 2016 arbitral award nagpabiling pinal ug legal nga nagbugkos. BDB BANAT NEWS