Kolorum nga tigsuyop sa hugaw sa tawo bistado

Lahi na gyud ang diskarte sa uban karong panahona aron lang makakwarta, bisan pa og makadaot na sa kinaiyahan ug sa panglawas sa publiko.

Mao ni ang kinaiya nga mas labaw pa nga baho sa hugaw nga anaa sa sulod sa septic tank.

Sama nalang niining usa ka panel van nga gidakop sa mga sakop sa Cebu City Environment and Natural Resources Office (CCENRO) diha sa Sitio Balagtas, Barangay Pahina Central.

Sa gawas, abi nimo og ordinaryo lang nga sakyanan nga nagdala ug mga commercial products. Pero pag-abli, nabisto sa sulod ang usa ka dakong tangke nga maoy sudlan sa hinabwang hugaw gikan sa mga septic tank!

Ang dako nga problema? Walay saktong papeles. Kolorum! Sa ato pa, walay accreditation gikan sa Local Government Unit (LGU) sa dakbayan sa Sugbo aron maka-operate sa maong matang sa negosyo.

Nasayran nga gikan pa sa Liloan ang maong operasyon, pero midayong ug sulod dinhi sa siyudad nga walay pananghid ug saktong rekisito.

Matud ni Joseph Agbalog, ang focal person sa Septage Unit sa CCENRO, seryoso kini nga isyung tukionon.

Dili lang kini yano nga isyu sa permit; isyu kini sa kalikopan ug panglawas sa katawhan. Nganong delikado man ang walay accreditation? Tungod kay kini sila, dili makasulod sa saktong Sewage Treatment Plant (STP).

Kon dili sila kasulod sa STP, dako ang posibilidad nga adto ra nila i-yabo o ilabay sa bisan asa—sa mga sapa, kanal, o bakanteng lote-ang makuha nilang hugaw sa tawo! Imadyina ang impact niana kon mosalitsit ang baho ug ang kagaw sa tibuok palibot.

Ang drayber miingon nga ipahibalo nalang niya sa iyang amo ang maong violation aron makatuman sa rekisito sa CCENRO.

Maayo nuon kon motuman. Pero ang pangutana, pila na kaha ka beses nga nakahimo sila niini sa wala pa sila masakpan?

Mao kini ang rason nganong angay kitang magmatngon isip mga kustomer. Kon magpakuha kita sa hugaw sa atong mga kasilyas, siguruha nga accredited sa gobyerno ang atong gikuha nga serbisyo. Ayaw lang sige’g pangita sa barato, kay basin ang dako nga danyos anha ra pud raba motugpa sa atong komunidad.

Saludo sa CCENRO sa ilang daling paglihok ug pagka-alerto. Hinaut nga magpadayon kini nga operasyon batok sa mga mapahimuslanon nga negosyante nga nagpataka lang og labay sa hugaw.