Floodwater reservoir giplano sa siyudad sa Sugbo

CEBU, Philippines — Gitan-aw sa Kagamhanan sa Dakbayan sa Sugbo ang posibilidad sa pagpalit og usa ka ektaryang yuta dapit sa Tisa-Labangon aron himuon nga floodwater reservoir, isip kabahin sa mas lapad nga plano sa siyudad aron masulbad ang problema sa pagbaha.

Sa press conference kagahapon, Agosto 3, 2026, gipahibalo ni Mayor Nestor Archival nga adunay dakong problema sa drainage system sa maong mga barangay human sa bag-ohay nga pagbaha sa La Paloma ug ubang bahin sa Tisa ug Labangon.

Gipasabot sa mayor nga ang luna nga himuong reservoir magsilbi nga catchment area alang sa tubig uwan nga gikan sa kabukiran sa dili pa kini moabot sa ubos nga mga lugar nga daghang residente sama sa Barangay Tisa ug Labangon nga maoy labing naapektuhan sa kusog nga pag-uwan sa niaging semana.

Ang nakitang rason sab ni Archival nganong dali bahaon ang syudad tungod kay nanggamay ang agianan sa tubig sa kasapaan sa syudad ug napuno na sab og basura ang sapa.

Gisaysay sab ni Archival nga bisan og adunay 104 ka flood-control projects ang siyudad ug kapin sa 70 porsiyento niini ang nahuman na, limitado ra gihapon ang epekto niini sa pagpugong sa pagbaha.

Gihulagway sa mayor nga nakatabang kini apan dili igo nga mapugngan ang baha sa syudad. Hinungdan nga namugna ang reservoir project sa Tisa-Labangon ug ipadayon sab ang desilting ug declogging operations sa tanang mga sapa sa siyudad.

Sa pagsugod sa Agosto 2026, anaa sa 400 ka personnel gikan sa nagkadaiyang departamento sa siyudad ug mga barangay volunteers ang miapil sa declogging operations sa Tisa-Labangon diin daghang basura ang nakabara sa mga sapa ug kanal.

Tungod niini, gimandoan ni Archival ang Department of Public Works and Highways (DPWH) ug ang City Engineering Office nga susihon pag-usab ang kahimtang sa drainage system sa lugar ug tan-awon kung adunay kalambigitan ang mga residential development sa kabukiran sa pagbaha sa ubos nga mga komunidad.

Nimando sab si Archival sa Cebu City Disaster Risk Reduction and Management Office nga sutaon pagbalik ang 2017 Drainage Master Plan nga gihimo sa DPWH ug mohatag og rekomendasyon aron adunay bag-ong drainage master plan. (BANAT NEWS)