Luzon ug Mindanao nisuplay og kuryente sa Visayas Grid

CEBU, Philippines — Nakatabang ang suplay sa kuryente gikan sa Luzon ug Mindanao aron mapugngan nga mapaubos sa red alert ang Visayas Grid bisan pa sa dungan nga pag-undang sa operasyon sa pipila ka dagkong power plants matud sa Department of Energy (DOE).

Kagahapon si DOE Undersecretary Mario Marasigan nagkanayon nga gideklara sa National Grid Corporation of the Philippines (NGCP) ang yellow alert sa Visayas Grid gikan alas 5:00 sa hapon hangtud sa alas 8:00 sa gabii tungod sa pagkunhod sa available nga generating capacity human nawad-an og operasyon ang Therma Visayas Inc. (TVI), Cebu Energy Development Corporation (CEDC), KEPCO SPC ug Toledo Power Corporation.

Matud ni Marasigan nga nakasinati og plant tripping ang Toledo Power pipila ka adlaw ang nilabay ug gilaoman nga makabalik sa operasyon sa Agosto 6, 2026 human sa assessment ug pag-ayo.Samtang ang CEDC usab nakasinati og outage sa wala pa ang naka-schedule nga preventive maintenance shutdown niini.

Alang sa TVI Units 1 ug 2, si Marasigan nagkanayon nga susama nga nakasinati og abnormal thermal problem ang ilang main turbines.

 Bisan pa nga naka-schedule na unta kini alang sa preventive maintenance nadiskubrehan ang depekto niadtong Mayo 12, 2026 nga nanginahanglan og dagkong pag-ayo.

Gibutyag ni Marasigan nga bisan pa sa pagkunhod sa generating capacity ang power imports pinaagi sa Mindanao-Visayas Interconnection Project maoy nakapadayon sa kalig-on sa grid.

Sa pagkakaron, nagpadala ang Mindanao og mga 400 megawatts (MW) ngadto sa Visayas sa hapon ug moabot sa 450 MW sa gabii, samtang ang Luzon nagahatag usab og 250 MW pinaagi sa interconnection.

Gipasadian sa DOE nga posibleng makasinati og yellow alerts ang Mindanao sa umaabot nga mga semana tungod sa pagsaka sa demand sa kuryente ug sa naka-schedule nga preventive maintenance sa pipila ka mga power plant. Gimandoan sa DOE ang NGCP nga daling makigsabot ug magkontrata og dugang ancillary reserve services.

Gikataho nga adunay 270 MW nga battery energy storage projects nga andam na’ng i-deploy sa Visayas diin mga 50 MW niini ang kasamtangang gi-testing ug gi-commission. (BANAT NEWS)