Susihon pa ni Archival kong angayang bakwion ang permit sa PIWS

CEBU, Philippines — Susihon una ni Cebu City Mayor Nestor Archival, Sr. kong angayan ba nga bakwion ang business permit sa Prime Integrated Waste Solutions (PIWS) human nga gidid-an ang siyudad nga molabay og basura ngadto sa maong pasilidad.

Kagahapon si Archival nagkanayon nga gisusi pa niya ang tanang posibleng lakang ug ang epekto ngadto sa mga pribadong garbage hauler nga naggamit gihapon sa landfill.

Ang PIWS nakadawat na og partial lifting sa cease-and-desist order gikan sa Department of Environment and Natural Resources-Environmental Management Bureau (DENR-EMB)-7 ug business permit gikan sa Business Permit and Licensing Office niadtong Abril 2026, tulo ka buwan human sa nahitabong trash slide niadtong Enero 8 niining tuiga.

 Ang kasamtangang operasyon karon sa PIWS mao ang pagdawat og basura gikan sa mga pribadong kompaniya.

Gipadayag ni Archival nga mamahimo na gyud unta nga makabalik og labay ang siyudad sa dihang nihatag na og pagtugot ang ahensiya nga makabalik sa operasyon ang PIWS samtang nagpadayon ang rehabilitasyon sa ubang bahin sa pasilidad.

Nagtuo ang mayor nga ang mga gipadayag nga kabalaka sa pipila ka konsehal ang nakatampo sa desisyon sa PIWS nga dili modawat sa basura sa siyudad bisan pa sa partial lifting nga gihatag sa DENR-EMB-7.

Matud ni Archival nga nakahukom ang PIWS nga maghuwat sa “full lifting” aron malikayan ang dugang kontrobersiya.

Giklaro ni Archival nga dili tibuok konseho ang nisupak pipila lang ka konsehal ug nakasabot usab ang mayor nga posible’ng nabalaka ang mga konsehal nga mas modako pa ang isyu sa Binaliw.

Ug dili na usab siya mamugos sa PIWS tungod kay nakahukom na kini nga maghuwat hangtud adunay hingpit nga paglibkas sa CDO bisan og aduna na usab kini giandam nga interim cell alang sa siyudad. (BANAT NEWS)