Pagsirit sa presyo ng petrolyo, nakaamba!
Dahil sa tensyon sa Red Sea
MANILA, Philippines — Posibleng muling sumirit ang presyo ng gasolina at diesel kung magpapatuloy ang tensyon sa pagitan ng Houthi movement ng Yemen at Saudi Arabia sa Red Sea, ayon kay Department of Energy-Oil Industry Management Bureau Director Rino Abad, nitong Biyernes.
Gayunman, nilinaw ni Abad na wala pa namang actual damage na napapaulat sa Petroline o East-West oil pipeline ng Saudi Arabia subalit kung mangyayari ito ay maapektuhan ang biyahe ng humigit-kumulang 6-7 milyong bariles ng krudo.
“Ngayon, nakabalik lang tayo sa P80 to P90 range at itong sustained na pangamba, ay hindi nalang ito sa Strait of Hormuz. Meron kasing emerging ngayon na pangamba, tumatalon na dito sa Red Sea,” pahayag ni Abad sa Super Radyo dzBB .
Pangamba ni Abad, sa sandalling magkaroon ng damage sa oil pipeline ay maaaring lumagpas sa P80 hanggang P90, o mas tataas pa ang presyo.
Batay sa mga ulat, sinabi ni Yemeni Foreign Minister-designate Afrah Al-Zouba na ginagaya ng Houthi sa Red Sea ang diskarte ng Iran sa Strait of Hormuz, na pagharang din sa mga barkong sa Bab el-Mandeb.
Sa Red Sea ngayon nagpapaputok na ng missile at drone ang Houthi laban sa Saudi Arabia at nagdeklara pa ng blockade sa mga barko ng Saudi. Gumaganti naman ang Saudi Arabia ng airstrikes laban sa mga pasilidad ng Houthi.
Ayon sa DOE, may sapat pang suplay ng langis sa bansa na tatagal ng 45 araw.
- Latest
