Eala miabante sa Quarterfinals

CEBU, Philippines — Gitagak ang defending champion sa Washington Open

Ang garbo sa Pilipinas nga si Alex Eala mipalayas ni defending champion Leylah Fernandez sa trono niini aron pag-abante sa quarterfinals sa Mubadala DC Open 2026 kagahapon sa kaadlawon (oras dinhi sa Pilipinas) didto sa William H.G. FitzGerald Tennis Center sa Washington, DC.

Si Eala mipatikangkang sa 7th seed gikan sa Canada sud sa duha ka sagunson nga sets 6-2, 7-6 (7/1) aron pag-angkon og luna sa Final 8.

Human gilampaso si Fernandez sa unang set, nabali ang huyop sa hangin sa sayong bahin sa ikaduhang set diin si Eala nabiyaan og kuwatro puntos, 5-1.

Apan ang World No.28 nga si Eala milusad og dalaygong resbak aron ilogon ang labaw, 6-5.

Mitusik pa hinoon si Fernandez hinungdan nga nakapuwersa kini og tiebreak.

Apan mao na kadto ang katapusang utong ni Fernandez kay gikastigo man siya sa 21-anyos nga si Eala sa tiebreak, 7-1.

“I think I had definitely some tough moments in that match and credits to Leylah, she put me in some really tough positions. I’m super proud of how I fought and how I stayed in there,” matud pa ni Eala.

Gawas nga mitikang sa sunod nga hugna sa torneyo, tam-is sab nga panimalos ang nakab-ot ni Eala batok ni Fernandez nga mipayaka kaniya sa Stuttgart Open niadtong Abril.

Sa quarterfinals karong Sabado, Agosto 1, sangkaon ni Eala si Elina Svitolina sa Ukraine o si Polina Kudermetova sa Uzbekistan.