Eala mikab-ot og laing dungog
Mikumpleto sa iyang dominasyon sa tanang Paris Olympics medalists
CEBU, Philippines — Ang Pinay tennis star nga si Alex Eala madasigong mibangon human mahagba sa unang set aron pakagingon si reigning Olympic champion Zheng Qinwen sa China, 4-6, 6-4, 6-1, ug moabante sa ikaduhang hugna sa Mubadala Citi DC Open 2026 sayo kagahapon sa buntag (oras dinhi sa Pilipinas) didto sa William H.G. FitzGerald Tennis Center sa Washington, DC.
"Just being patient and being brave, waiting for my opportunities," matud pa ni Eala sigun sa taho sa Agence France Presse.
"It was a very difficult match. I was at some difficult points but I'm happy with how I was able to turn it," dugang pa ni World No.28 Eala human gipayaka ang 2024 Paris Olympics gold medalist nga si Zheng sa makutas nilang sangka nga milanat og duha ka oras ug 26 minutos.
Tungod niini, si Eala mikumpleto sa iyang dominasyon sa tanang tulo ka women's singles medalists sa Paris Games. Nakab-ot niya kining laing dungog sa iyang karera sud lamang sa lima ka semana. Ang 21-anyos nga garbo sa Quezon City unang mibuntog ni silver medalist Donna Vekic sa Croatia sa Berlin Open niadtong Hunyo 17 ug dayon mipakurat ni bronze medalist Iga Swiatek sa Poland sa Wimbledon niadto lamang Hulyo 4. Sa pagsulat ning taho, si Eala nakigharong pa batok ni defending champion Leylah Fernandez sa Canada alang sa luna sa quarterfinals.
Si Eala naglaraw nga makabawos ni Fernandez, nga mipukan kaniya sa Stuttgart Open niadtong Abril.
- Latest
