Eala misuwat pag-usab og kasaysayan

CEBU, Philippines — Abante sa ikatulong hugna sa Wimbledon

Si Alex Eala misuwat pag-usab og kasaysayan human gitagak niya si Maya Joint sa Australia aron mamahimong labing unang tennis player gikan sa Pilipinas nga nakaabot sa ikatulong hugna sa usa ka Grand Slam sa Open era.

Nadasig sa mainit nga abida sa iyang mga kababayan, si Eala impresibong mibangon human natumba sa unang set aron pakagingon si Maya sa tulo ka sets, 3-6, 6-2, 6-0, sa 2026 Wimbledon Championships niadtong Huybes sa gabii didto sa All England Lawn Tennis and Croquet Club sa London.

Usa kini ka tam-is nga panimalos alang sa 21-anyos nga si Eala, nga nakatilaw og mapait nga kapildihan sa mga kamot ni Joint atol sa Eastbourne Open final sa miaging tuig,

"It's an amazing thing for me to be able to do that for my country, but I guess it's also very emotional every time I'm able to pass a new step or break new ground, just because it's also personal goals and personal achievements," matud pa sa 29th seed nga si Eala.

Si Eala unang mihimo og kasaysayan sa dihang nahimo siyang labing unang Pinay nga nasud sa Top 100 sa world rankings ug labing una nga mi-qualify sa main draw sa usa ka Grand Slam sa French Open didto sa Paris sa miaging tuig.

Ning bag-ohay pa lamang, ang garbo sa siyudad sa Quezon mikulit na sab sa iyang pangan sa bato isip labing unang Filipina netter nga miduwa isip usa ka seeded player sa Wimbledon.

Laing rekord ang iyang nalansang human gibugha ang World No.53 nga si Maya.

Karon, si Eala nangandam alang sa ikatulong sangka sa nagkainit nilang panagkaribal ni defending champion Iga Swiatek sa Poland sa last 32 nga gikatakda karong adlawa (Sabado, Hulyo 4).

Tabla sa kasamtangan ang ilang head-to-head record, 1-1. Si Eala mipakurat ni Swiatek sa 2025 Miami Open quarterfinals, apan miyukbo siya sa Pole sa ilang rematch sa Madrid Open pipila ka semana ang milabay.