PYFBA modribol alang sa mahinungdanong kawsa

CEBU, Philippines — Migamit sa sports isip plataporma aron makahimo og kaayuhan sa komunidad, ang Professional Youth Fellowship Basketball Advocates (PYFBA) nga gipangulogan sa Sugbuanong sportsman nga si Dee J Villanueva mosalmot sa usa ka tree planting activity isip kabahin sa selebrasyon sa World Environment Day karong Biyernes, Hunyo 5.

  Naestablisar niadtong 2001, ang PYFBA nga nakabase sa dakbayan sa Talisay usa ka grassroots nga programa sa paugnat sa kusog ug organisasyon nga nagkumbinar sa pagbansay sa basketbol uban sa pagpalambo sa mga kabatan-onan aron mamahimo silang takos nga mga sakop sa katilingban.

"Mao gyud ni kanunay ang among tumong - ang pagtudlo og disiplina, pagtinabangay, ug pagkiglambigit sa komunidad samtang nagdasig sa mga batan-on sa mga mapuslanong kalihokan," matud pa ni Villanueva, ang 2025 ORLACSAN Awardee sa Sportswriters Association of Cebu (SAC) tungod sa iyang dedikasyon ug talagsaong mga buhat gawas sa korte.

Gigiyahan ning maong panglantaw, si Villanueva miawhag sa tanang mga miyembro sa PYFBA ingon man sa mga players gikan sa nagkadaiyang ballclubs sa Talisay sa pagsuporta ning mahinungdanong kalihukan.

Si Villanueva nagkanayon nga ang Pagtambayayong Foundation Inc. inabagan sa nagkalain-laing mga grupo gikan sa Talisay LGU apil na ang mga mag-uuma, mananagat, kahugpongan sa mga kabatan-onan ug sektor sa mga kabus naglaraw nga motanom og 300 ka mga liso sa bakhaw gikan sa alas-6 ngadto sa alas-8 sa buntag sa Sitio Pagatpat sa Barangay Dumlog.

Isip pahalipay, ang mga mosalmot ning dalaygon nga inisyatiba sa PYFBA makapakita'g aksiyon sa 5x5 nga liga ug 3-point shootout nga giorganisa ni Villanueva karong Domingo, Hunyo 7, sa Aulga City Sports Gym sa may dalan Sombria, Barangay Lawaan II.

"Nanghinaut mi nga sa gamay namong paagi, makahimo mi og positibo nga epekto ug makahatag og kontribusyon  pagprotekta sa atong kalikopan pinaagi sa sports," panapos pa ni Villanueva.