Lalaki gipusil sa batiis

CEBU, Philippines — Nalandig sa tambalanan ang usa ka 36-anyos nga lalake human kini gipusil sa Sitio Bugnay 2, Barangay Labangon, siyudad sa Sugbo kagahapon sa kaadlawon, Domingo, Disyembre 22, 2024.

Ang biktima mao si Serafin Salahid Mahilum, 36, nagpuyo sa Sitio Bugnay 1, Barangay Labangon ning siyudad. Samtang ang nagpusil kaniya usa ka lalakeng nagsul-ob og long sleeve color pink ug short pants nga maong.

Sa imbestigasyon sa Labangon Police Station 10 Cebu City Police Office base sa gibutyag sa biktima, samtang naglakaw siya sa sudlunon nga bahin sa naasoy nga dapit kalit lang nibabag sa agianan ug sa wala'y igong rason gipusil siya niini sa tuo nga batiis.  Human sa insidente daling nisibat ang maong lalaki.

Padayon nga gipangita sa kapulisan sa Labangon Police Station 10 ang suspek ug gitino pa kun unsay motibo sa pagpusil sa biktima. — /IBM (BANAT NEWS)