Fixed term nga lima ka tuig sa barangay officials

CEBU, Philippines — Giduso ni Senate President Francis “Chiz” Escudero ang pag-establisar og fixed five-year term alang sa mga opisyal sa barangay ug Sangguniang Kabataan (SK), imbes nga balik-balik nga i-postpone ang barangay elections.

Atol sa public hearing sa Senate Sub-Committee on Local Government niadtong Lunes, gipasiugda ni Escudero nga ang iyang Senate Bill No. 2387 dili yano nga extension sa termino sa kasamtangang mga opisyal.

“My bill does not extend. My bill fixes,” matud ni Escudero sa usa ka press statement.

Matud niya ang tinuod nga tumong niini mao ang pagtakda og lima ka tuig nga termino ug usa ka klaro ug permanente nga iskedyul sa eleksyon.

Matud ni Escudero, gikinahanglan nga mas taas ug stable ang termino aron mapadayon ang mga programa sa komunidad, disaster response, peace and order ug uban pang frontline services nga dili pirming maapektuhan sa election cycle.

Nakakuha og suporta ang maong balaodnon gikan sa mga representante sa Liga ng mga Barangay, National Citizens’ Movement for Free Elections (NAMFREL), Parish Pastoral Council for Responsible Voting (PPCRV) ug National Youth Commission (NYC).

Ubos sa SB 2387, magpabilin ang kasamtangang term-limit rules. Ang barangay officials mahimong makaserbisyo og hangtod tulo ka sunod-sunod nga termino, samtang ang SK officials limitado sa usa ka termino.

Ang mga barangay officials nga anaa na sa ilang ikatulong sunod-sunod nga termino dili na mahimong mokandidato sa November 2028 elections.

Gihisgutan usab sa hearing ang Senate Bill No. 2067 ni Senator Imee Marcos, nga nagtumong sa pag-postpone sa November 2026 BSKE ngadto sa Oktubre 2027 tungod sa economic ug logistical constraints.

Samtang, ang kanhi COMELEC Commissioner Rowena Guanzon mikwestiyon sa posibleng postponement sa BSKE, nga matud niya mahimong adunay political implications tungod sa posibilidad nga magpabilin sa puwesto ang mga incumbent barangay officials  hangtod sa 2028 elections. IBM BANAT NEWS