Mga kabtangan sa Daanbantayan nga dili na magamit gikwestyon

CEBU, Philippines — Gisita sa Commission on Audit (COA) ang 479 ka kabtangan sa Munisipyo sa Daanbantayan, Cebu, nga dili na magamit ug nagkantidad og ?28.26 milyon, apan wala pa mabaligya hangtod Disyembre 31, 2025.

Sa 2025 Annual Audit Report, miingon ang COA nga ang maong mga kabtangan nga nagkantidad og ?28,263,626.69 wala pa malikidar, hinungdan nga nameligro kini nga mas madaot ug mawad-an ang munisipyo sa posibleng kita gikan sa pagbaligya niini.

 Sumala sa COA, supak kini sa Section 379 sa Republic Act No. 7160 o Local Government Code ug sa COA-DBM Joint Circular No. 2024-1 nga gipagawas niadtong Enero 30, 2024.

Gipadayag sa audit nga 17 sa 479 ka kabtangan walay natala nga kantidad.

Base sa Unserviceable Property Report nga gisumite sa administrasyon sa munisipyo, gilakip sa listahan ang petsa sa pag-angkon, deskripsiyon, numero sa kabtangan, gidaghanon, presyo matag yunit, kinatibuk-ang kantidad ug mga opisina diin kini gigamit o gitugyan.

Apan, wala kini maglakip sa impormasyon bahin sa depreciation, impairment losses, carrying amounts ug mga detalye sa pagbaligya o paglabay sa mga kabtangan, kon aduna man.

Gipahibalo usab sa General Services Office (GSO) designate nga wala pa maporma ang Inventory/Disposal Committee tungod sa pagbalhin ngadto sa bag-ong administrasyon.

Sa inspeksiyon sa COA, nakita sa mga auditor ang pipila ka mga sakyanan nga dili na magamit nga nagkatag sulod sa motor pool ug nabuwad sa init sa adlaw, tubig-ulan ug uban pang elemento sa kinaiyahan.

Dugang pa sa COA, ang dugay nga pagtago sa maong mga kabtangan nag-okupar sa mga lugar nga mahimong magamit unta alang sa ubang operasyon sa munisipyo.

Girekomenda sa COA nga magporma ang munisipyo og Inventory Committee nga maoy mag-inventory, mag-inspeksiyon ug magtimbang-timbang sa mga kabtangan nga dili na magamit. (BANAT NEWS)