Pagbanhaw sa ‘Dragon Ball’

CEBU, Philippines — Gipakita  na sa Netflix ang trailer alang sa anime series nga “Dragon Ball Super: Beerus,” nga magsugod na og  streaming karong Oktubre 17.

Sentro sa istorya niini ang  panagsangka tali sa bida  nga si Son Goku ug sa kontrabida  nga si Beerus, nga nailhan isip “God of Destruction.” Nagpanikad na niini ang karaang fans sa maong anime series .

Kinahanglan nga makasimba

Gipaneguro ni Gabbi Garcia nga dili siya  mapakyas sa pagsimba matag Domingo.Bisan  pa og busy ang iyang iskedyul o anaa siya sa laing nasud, mangita gyud siya og paagi mga makasimba gumikan kay mao na gyud kini ang iyang naandan .Nagkanayon ang aktres  usa kini sa iyang mga naandan  nga dili niya gustong ikompromiso.

Andam makigtingog

Bukas ang aktor nga si Dennis Trillo sa posibilidad nga magtingog sila og balik ni Patrick Garcia, tungod kay para kaniya, ang matag tawo angayan hatagan og ikaduhang higayon o tsansa nga mag- usab . Kahinumdoman nga wala mahimout si Dennis sa dihang nagpa-interview si Patrick ug gihisgotan ang panagbulag nila kaniadto ni Jennylyn Mercado . Suma pa ni Dennis nga mahimo ra gyud unta istoryahan sa personal ang maong butang ug dili na unta mosangpot sa panagbangi.

Buwagan dayon

Dili na kinahanglan nga magdugay pa ang usa ka relasyon kung maabot sa punto nga manapat ang lalaki ngadto sa babaye.  Mao kini ang baruganan sa Vivamax actress nga si Jenn Rosa . Suma pa ni Jenn nga nakasinati na siya sa maong sitwasyon busa  gibuwagan dayon niya ang lalaki .  

Cebuana mi-perform  sa dakong event sa  China

Wala  damha sa Cebuana singer-songwriter nga si Jolianne ang mainitong paghangop  sa iyang pag-perform  didto  sa China.

Bag-ohay lang  nikanta  si Jolianne sa main stage sa Tianmu Mountain Music Festival 2026 sa Hangzhou, China, diin iyang gidalit  ang iyang mga awit ngadto sa daghang tawo nga nagpabilin bisan pa sa kusog nga ulan.

Mapasalamaton siya sa tanang nisuporta sa pag-perform niya sa maong kalihokan .

SB19 mikanta sa official song sa ASEAN 2026

Gipahibalo na sa Department of Tourism (DOT) ang opisyal nga awit  alang sa ASEAN 2026 nga gikanta   sa Kings of P-Pop nga SB19.

Ang maong awit  kay nag-ulohan og  “Together in Motion” nga gisulat ni Anya Lagman ug gi-arrange nila Jimmy Antiporda ug Louie Ocampo.

Una na nga gitudlo sa DOT ang SB19 isip tourism ambassadors sa Pilipinas. Ang 49th ASEAN Summit, kay pagahimoon sa Pilipinas karong  Nobyembre 16 hangtod 18.

FITBOD Cebu 2026

Bag-ong kompetisyon  nga nagtutok  sa disiplina ug maayong panglawas

Dili lamang katahom ug pisikal nga panagway ang sentro sa usa ka bag-ong kompetisyon nga nisulbong  sa Cebu, kundili  ang pagpasiugda sa disiplina, pag-atiman sa kaugalingong panglawas, mental wellness ug pagsalig sa kaugalingon.

Kini mao ang  umaabot nga national fitness competition nga gitawag og Fitbod Cebu 2026 ug ang  sikat nga designer nga si Danny Booc maoy pageant director niini.

Ang grand finals sa  Fitbod Cebu 2026 kay mahitabo karong Oktubre 25 sa Waterfront Cebu City Hotel and Casino.

Matud ni Booc, lahi ang konsepto sa Fitbod Cebu kumpara sa naandang pageant tungod kay ang “wellness” ang gihatagan og gibug-aton niini.  Daghan ang misalmot sa screening, apan human sa lapad nga proseso sa pagpili,  napili nga labing angayan nga  opisyal nga finalists. Gipakita usab sa kompetisyon nga ang fitness dili limitado sa edad, gender o kahimtang sa kinabuhi. Ang finalists kay  naggikan sa nagkalain-laing dapit.

Sa female category, nisalmot sila Karen Sario Rivero (Leyte), Christine Abellon (Biliran), Neome Jay Dela Cruz (Davao Oriental), Berry Tanya Bandal (Northern Samar), Mary Bernadette Aganan (Inayawan, Cebu City), Asha Alexandrea Mapalo (Cebu City), Hanna Vi Agravante (Cebu City), Ryanne Medida (Guadalupe, Cebu City), Lynn Tampus (Mandaue City), Septy Magaspi (Mandaue City), Lyecca Marie Gallardo (Talisay City), Janice Schlaucher (Talisay City), Denia Deiparine (Talisay City), Josephine Malilay (Lapu-Lapu City), Grethel Ponce (Balamban), Lyca Mae Saplad (Daanbantayan), Frelyn Flores (Mandaue City), Janna Eliza Dodson (Sikatuna, Cebu City), ug Barbiee Salcedo (Labangon, Cebu City).

Sa male category, ang finalists kay  sila Isias Quinikito (Mabolo, Cebu City), Jeff Roco (Lahug, Cebu City), Prince Abelgas (Lahug, Cebu City), Francis Muhfad (Guadalupe, Cebu City), Roland Carlos (Fuente, Cebu City), Roderick Buot (Cebu City), James Hanma (Cebu City), Glynmark Juan Enad (Cebu City), James Kerck Luis (Cebu City), Nathaniel Alce (Cebu City), Glyde Patonongon (Lapu-Lapu City), Jay Rhalf Velasquez (Lapu-Lapu City), Norvien Arranchado (Lapu-Lapu City), Serge Fiel (Mandaue City), Ben Paraiso (Talisay City), John Clarence Abucay (Consolacion), Gerald Flores (Naga City), Manner Jay Granada (Minglanilla), Clark John Alcoseba (Minglanilla), Jeuse Panganiban (Compostela), Dayzon Sario (Badian), Julito Ponce Jr. (Balamban), Gabriel Reyes (Sigarao), Samryl Fernandez (Bacolod City), Revie Lacorte (Cebu City), ug Jonathan Carlobos (Pardo,).

Si  Karen Sario Rivero (Leyte) maoy nakakakuha sa pasiuna  nga pasidungog nga  Best in Streetwear – Female ug Miss Winzen Cafe, samtang si Jonathan Carlobos (Pardo) maoy nakadaog isip  Best in Streetwear – Male.

Sa press presentation nga gihimo sa SM Seaside, gipakita sa candidates  ang ilang katakos sa pagrampa pinaagi sa streetwear fashion show .

Ang nakaangkon sa Media’s Choice Awards kay sila Isias Quinikito (male) ug Janna Eliza Dodson (female).