13 miyembro ng TBS, naaresto ng NCRPO

MANILA, Philippines — Nasa 13 miyembro ng True Brown Style (TBS) na nasangkot sa mga kasong kriminal mula Agosto 2024 hanggang Setyembre 28,2026 ang naaresto ng National Capital Region Police Office (NCRPO).

Anim ang nadakip sa mga lugar na sakop ng Southern Police District (SPD), apat sa ilalim ng Manila Police District (MPD), 2 sa Quezon City Police District (QCPD), at 1 sa ilalim ng Northern Police District (NPD).

Base sa tala ng pulisya, ang 13 naarestong personalidad ng TBS ay may kaugnayan sa kabuuang 21 umano’y paglabag, kabilang ang apat sa iligal na pagdadala ng baril, tatlong kaso ng illegal gambling, tatlong kaso ng kidnapping o illegal detention, at dalawang kaso na may kinalaman sa illegal na droga.

Kabilang sa iba pang umano’y paglabag ang theft, homicide, trafficking in persons, cybercrime, paglabag sa Anti-Hazing Law, child abuse, grave coercion, resistance o disobedience to a person in authority, at iba pang paglabag sa special laws.

“We will continue to track down other members of TBS, particularly those who engage in illegal activities and those who recruit or influence young people to commit crimes,” ani NCRPO Police Brig. Ge­neral Christopher Abrahano.

Iniutos ni Abrahano sa nasasakupang police districts na palakasin ang intelligence, police ­operations, at community-based interventions laban sa TBS, lalo na sa mga gawaing pagre-recruit ng grupo, grooming para gumawa ng mga pagnanakaw lalo na sa mga menor-de-edad, alinsunod sa direktiba ni Interior and Local Government Secretary Jonvic Remulla and PNP Chief Police General Jose Melencio Nartatez Jr.