Governor`s cup gibalik sa probinsiya sa Sugbo

CEBU, Philippines —  Human sa pito ka tuig nga paghunong, gibalik sa Cebu Provincial Government ang Governor’s Cup U-18 Basketball Tournament, nga dunay budget nga P8.9 milyon alang sa duha ka bulan nga kompetisyon.

Sumala kang Assistant Provincial Administrator Aldwin Empaces, ang P8.9 milyon nga budget mao ang approved allocation base sa gisumite ngadto sa Office of the Governor. Apil niini ang mga gasto alang sa referees, commissioners ug uban pang panginahanglan sa torneo.

Opisyal nga gisugdan ang kompetisyon niadtong Sept. 27 sa Mandaue City Sports Complex pinaagi sa ceremonial toss nga gipangulohan ni Gov. Pamela Baricuatro ug PBA legend ug kanhi Philippine Sports Commission commissioner Ramon “El Presidente” Fernandez. Mitambong usab sa opening ceremony si Mandaue City Mayor Jonkie Ouano ug Cebu Provincial Sports Commission Chairman Dr. Rhoel Dejano. Mokabat sa 44 ka mga lungsod ug siyudad sa tibuok Cebu ang miapil sa province-wide basketball tournament.

Aron mapadali ang kompetisyon ug malikayan ang dako nga gasto sa pagbiyahe sa mga teams, gibahin ang mga partisipante ngadto sa Northeast, Northwest, Southwest ug Southeast areas. Aduna usab Islands tournament nga naglangkob sa San Francisco ug tulo ka island municipalities sa Mactan Island.

Alang sa mga mananaog, ang champion makadawat og P500,000 nga cash prize, samtang aduna usab og cash prizes alang sa ubang top teams. Aduna usab og individual awards sama sa season MVP ug finals MVP.

Ang matag participating municipality makadawat usab og P50,000 nga assistance o subsidy gikan sa probinsya. Gawas pa niini, ang provincial government maoy nag-cover sa uniforms sa mga teams, samtang ang P50,000 mahimong gamiton sa mga LGU alang sa uban pang panginahanglan sama sa sports transportation.

Dili lamang kompetisyon ang tumong sa Governor’s Cup, sumala kang Empaces, tungod kay gidesinyo kini isip grassroots development program alang sa mga batan-ong basketball players nga 18 anyos paubos. Ang mga players adunay oportunidad nga ma-scout sa mga local universities ug colleges, lakip na ang mga eskwelahan sa Manila.