AiAi nakahuman sa Hyrox race sa Rome

CEBU, Philippines —  Nagmalampuson ang 61 anyos nga si AiAi Delas Alas sa pagsalmot niya sa Hyrox solo race didto sa Rome, Italy sa niaging adlaw .

Sa iyang Instagram post, gipaambit sa aktres  nga iyang gihagit ang kaugalingon sa pag-apil sa fitness race isip solo participant ug dul-an  tulo ka oras ang iyang gigahin aron kini mahuman.

Suma pa  ni AiAi, grabe ang kasakit sa cramps sa iyang duha ka bitiis samtang nagpadayon sa lumba ug nakaabot siya sa punto nga gusto na niyang mohunong. Apan iyang nahinumdoman ang kaugalingon kon nganong nagsugod siya ug mipadayon gyud hangtod sa kataposan sa maong race .

“Almost 3 hours, but I survived, I finished, and I proved to myself that age is just a number when your heart refuses to give up,” niya pa.

Alang kang AiAi, dili ang oras ang importante sa maong lumba kondili ang kaisog, kalig-on ug determinasyon sa pagpadayon bisan lisod na.

Ang Hyrox kay usa ka global indoor fitness race nga naghiusa sa running ug functional workout stations. Sa kompetisyon, modagan ang mga partisipante og usa ka kilometro ug dayon mohimo og usa ka functional workout station, nga balikon sa walo ka higayon.