Nanginhas naigo og kilat patay

CEBU, Philippines — Patay ang usa ka 62-anyos nga lalaki human gituohang naigo og kilat samtang nanginhas kuyog sa iyang asawa sa Sitio Mobil, Barangay Dunggo-an, Danao City, Cebu, pasado alas 4 sa hapon niadtong Septiyembre 21, 2026. Ang biktima nga giila pinaagi sa alyas “Edgar,” 62, giingong nanginhas uban sa iyang asawa sa maong lugar sa dihang nahitabo ang insidente.

Base sa inisyal nga impormasyon, gituohang naigo sa kilat ang biktima samtang didto sila sa Sitio Mobil. Dali nga nangabot ang mga tawo ug gitabangan siya sa pag-aswat padung sa daplin sa dalan.

Human sa insidente, gilayon siyang gidala sa Cebu Provincial Hospital-Danao City sa mga taga ambulansiya, apan patay na siya pag-abot didto.

Padayon ang imbestigasyon sa kapolisan aron mapamatud-an ang mga sirkumstansiya sa insidente ug ang gikatahong pagkaigo sa biktima sa kilat.

Nipahimangno ang mga otoridad nga likayan ang pag-adto sa kabaybayonan kung maglain ang panahon ilabi na kung naay panugdog ug kilat.— IBM BANAT NEWS