Monterrazas nipasalig nga gilabwan nila ang engineering standards

CEBU, Philippines — Gipasabot sa Monterrazas de Cebu nga walay drainage system o detention ponds nga ilang gitukod ang makasugakod sama sa gikusgon sa bagyong Ruping apan nipasalig kini nga gilabwan nila ang engineering standards sa ilang flood control system aron mo-control ang tubig uwan ug dili kini maabot sa ubos nga bahin sa barangay sa panahon nga mobunok ang uwan.

Sa site tour kagahapon Setiyembre 22, 2026, si Construction Head Ranel Pelpinosas nagkanayon nga ang drainage design sa proyekto nagbase sa rainfall intensity, gidugayon sa uwan, frequency sa bagyo ug sa kinaiya sa yuta lakip na ang gidaghanon sa runoff gikan sa developed ug undeveloped nga mga bahin sa 118 ka ektaryang property.

Matud ni Pelpinosas nga triple ang pagpalapad sa kapasidad sa ilang drainage system ug gilabwan ang minimum requirement nga gilatid sa storm drainage standards nga gigamit sa pagkuha sa ilang permits.

Ang developer niluwat og pamahayag human gikwestyon ni Bise Mayor Tomas Osmeña ang kapasidad sa detention ponds sa Monterrazas.

 Gipresentar ni Osmeña ang iyang personal nga kalkulasyon nga mahimong moabot sa kapin 300,000 cubic meters ang runoff sa tibuok 118 ka ektaryang property base sa uwan sa bagyong Ruping apan matud sa developer nga dili kini opisyal nga technical finding sa konseho.

Gipasabot sab ni Pelpinosas nga ang detention ponds dili usa ka dako nga catchment alang sa tibuok property apan naglihok pinaagi sa sunod-sunod nga pagdawat ug kontroladong pagpagawas sa runoff gikan sa matag catchment aron malikayan ang kalit nga pagbaha sa ubos nga mga komunidad.

Si Monterrazas General Manager Marie Camille Bondad nagkanayon nga human sa uwan ilang hinay-hinay nga gipagawas ang tubig sa detention ponds pinaagi sa storm pump aron mabalik ang storage capacity niini sa dili pa mosunod ang laing pag-uwan.

Matud ni Bondad nga human sa bagyong Tino ug sa kusog nga uwan niadtong Hulyo 30, 2026 walay discharge gikan sa detention system bisan pa nga adunay pagbaha sa pipila ka silingang barangay.

Ang proyekto usab adunay duha ka PAGASA-accredited weather stations nga naghatag og rainfall data sa mga ahensiya sa gobiyerno.

Nunot niini, si Pelpinosas nipadayag nga ang drainage design nagbase sa 50-year return period ug sa runoff coefficient sa yuta.

Sa 118 ka ektaryang proyekto, 53 ektarya na ang nahuman, 28 ektarya ang gi-develop pa, ug 37 ektarya ang wala pa matandog samtang adunay 24 ka detention ponds sa kinatibuk-an. BDB BANAT NEWS