Pork ug eligibility

Giingon ni Ombudsman Crispin Jesus "Boying" Remulla nga adunay pork barrel ang mga opisyal sa barangay gikan sa kapitan hangtod na sa mga konsehal sa Sangguniang Kabataan.

Nakalitan ko sa akong nadungog gikan ni Ombudsman Remulla kay una kining higayon nga nakadungog ko nga aduna diay pork barrel ang mga opisgal sa barangay ug ang kasayoran gikan pa gayod sa Ombudsman.

Tuig 2013 pa ko napili nga konsehal sa Barangay Quiot ug ania na ako karon sa akong kataposang termino. Ug ning mao nga gitas-on sa panahon mao usab ang gitas-on sa akong paghupot sa Committee on Appropriations o Budget sa konseho sa barangay. Ug ning maong gitas-on ug gidugayon sa akong paghupot sa budget wala man ko makakita og items alang sa pork barrel sa mga opisyal sa barangay ug kun anaa man, asa man kini kuhaa?

Ambot kaha ang mga dagkong Barangay sama sa Barangay Guadalupe, Tisa, Lahug, Basak San Nicolas ug Labangon ning dakbayan sa Sugbo anaa ba kaha sila niini unya wala lang sila magsaba-saba, pero dako ang akong pagtoo nga wala usab sila niini.

Mangotana ko ni Ombudsman Remulla asa man sa Budget sa Barangay kuhaa ang iyang giingon nga pork barrel?

Ang pinakaduol sa giingon ni Ombudsman Remulla nga pork barrel mao seguro ang discretionary fund sa mga barangay kapitan nga anaa sa 2% sa Real Property Tax nga share sa barangay.

Kun mao man kini ang gipasabot ni Ombudsman Remulla, wala poy labot niini ang mga konsehal kay iya man lang kini sa kapitan. Ang discretionary fund mao kini ang pundo nga kuhaan sa gusto nga gastohan sa Kapitan ug walay labot niini ang mga konsehal.

Mas maayong klarohon ni Ombudsman  Remulla asa ning iyang giingon nga pork barrel sa mga opisyal sa Barangay ug Sangguniang Kabataan kay mapaninglan ta ani sa mga tawo.

* * *

Gisugyot ni Ombudsman Remulla nga himoong kuwalipikasyon sa piliong opisyal sa barangay mao kadtong adunay civil service eligibility. Maayo kaha kini? Kun mao man ugaling kini ako pod nga isugyot nga i-apil pod sa kuwalipikasyon sa tanang magpapili nga opisyal sa nasud ang ilang civil service eligibility ug wagtangon na lamang ang able to read and write nga kuwalipikasyon.