Kanus-a tawgon sa Malakanyang?

Inay mangayo og despensa sa gihimong pagdasmag sa Chinese Coast Guard sa barko sa Bureau of Fisheries and Aquatic Resources (BFAR) niadtong Biyernes, Setyimbre 18, samtang naghatod og krudo alang sa mga mangingisda didto sa West Philippine Sea, gidasonan hinoon sa Chinese Embassy didto sa kaulohan ang bakak sa ilang coast guard.

Sa ilang opisyal nga pamahayag human sa hitabo, gibasol sa Chinese Embassy ang BRP Datu Magat Salamat (MMOV 3015) nga maoy mibabag sa agianan sa barko sa China hinungdan nga nahitabo ang panagsingki.

Ilang gipasanginlan ang barko sa BFAR nga wala maminaw sa pasidaan sa Chinese Coast Guard ug mipaturatoy hinuon og lawig latas sa ilang atubangan. Dia na sad ta aning pa victim sa China.

Kanus-a man tawn mahitabo nga ang hulmigas manghagit sa elepante? Wala mabatasan sa Pilipinas nga manguna labi pa og higante ang iyang kaatbang sama sa China.

Apan makapaniguro sab ko nga di motalaw ang Pilipinas og away kun pasipad-an ang katungod ug teritoryo niini.

Tataw sa kinatibuk-an sa video nga kuha sa BRP Datu Magata Salamat nga ang mas dako nga barko sa Chinese Coast Guard ang migukod nila ug midasmag. Way rason nga ang barko sa Pilipinas maoy manasmag sa Chinese Coast Guard tungod kay mas dako ang ilang barko.

Gawas pa nag-unsa man ang Chinese Coast Guard sulod sa teritoryo sa Pilipinas?

Ang panagbangga nahitabo 54 nautical miles gikan sa kabaybayonan sa Palawan.

Ang maong gilay-on nasakop pa intawn sa exclusive economic zone sa Pilipinas ug nga wa gyud untay katungod ang barko sa China nga magpatrolya sa maong dapit.

Klaro nga kalapasan ang gihimo sa Chinese Coast guard sa 1972 Convention on the International Regulations for Preventing Collisions at Sea (COLREGs), United Nations Convention on the Law of the Sea (UNCLOS), ingon man sa 2016 Arbitral Award nga nag-ila sa katungod sa Pilipinas sa kadagatan sulod sa iyang exclusive economic zone.

Human sa hitabo niadtong Biyernes, naghuwat ko nga ipatawag sa Malakanyang ang embahador sa China tungod sa mga pamahayag nga giluwatan sa iyang buhatan nga tataw nga milapas sa diplomatic protocol ug nagpakita sa pagka way respito sa iyang host country.

Kun gikinahanglan, unsa may nagpugong nato nga ideklarar ang maong opisyal nga persona non grata dinhi sa Pilipinas.