Ban sa dinastiya
Human gisugo sa Korte Suprema ang Kongreso sa dinaliang pagpanday og balaod nga modili sa politikanhong mga dinastiya, giduso ang pag-ban sa kandidatura sa mga paryente sa mga politiko hangtod sa 4th degree sa consanguinity (kadugo) ug affinity (kaminyuon). Niang lista sa mga maapektahan:
• Consanguinity: Ginikanan ug anak (1st degree); apohan, apo ug igsuon (2nd degree); uyoan, iyaan ug pag-umangkon (3rd degree); ug ig-agaw igtagsa (4th degree).Affinity: asawa o bana (1st degree); ugangan ug umagad (2nd degree); apohan ug apo sa asawa o bana ug bayaw (3rd degree); apohan ug apo sa tuhod, uyoan, iyaan ug pag-umangkon sa asawa o bana ug ig-agaw igtagsa sa bana o asawa (4th degree).
-o0o-
Kon mapatuman, mabungkag ang higanteng mga dinastiya: Marcos-Romualdez sa Ilocos Norte ug Leyte; Duterte sa Davao; Villar sa Las Piñas; Escudero sa Sorsogon; Zubiri sa Bukidnon; Estrada-Ejercito sa San Juan; Singson sa Ilocos Sur;
Hataman-Salliman sa Basilan; Pacquiao sa Saranggani; Kho sa Masbate; Dy sa Isabela; Ortega sa La Union; Revilla, Tolentino ug Remulla sa Cavite; Tan sa Sulu; Dimaporo sa Lanao del Norte; ug Alonto-Adiong sa Lanao de Sur.
* * *
Dili sab makaikyas ang mga dinastiya sa Sugbo: Garcia ug Frasco sa ikalima ug ikatulong distrito; Chan sa Lapu-Lapu; Ouano sa Mandaue; Gullas sa unang distrito; Lagon sa ikaunom ug ikatulong distrito; Alegado sa Consolacion;
Durano sa Danao; Calderon sa ikaduha ug ikapitong distrito; Martinez sa Bogo ug San Remigio; Osmeña, Archival ug Rama sa Cebu City; Chiong sa Naga; Barcenas sa Carcar; Binghay sa Balamban; ug Diamante sa Tuburan.
* * *
Mas dako ang posibilidad nga lasaw nga ban sa political dynasties ang aktuwal nga mapasar sa Kongreso (hangtod lang sa second degree). Kay dili kalaoman nga isakripisyo sa mga kongresista ug mga senador ang ilang politikanhong kaugmaon.
Walay gahom ang Korte Suprema sa pagpugos sa House ug Senado pag-ban sa politikanhong dinastiya. Pero ang lapad nga suporta sa katawhan, nga dili motugot nga sumpayan pa ang 39 ka tuig nang kalangay sa pagpatuman sa 1987 Constitution, maoy kinakusganong puwersa. Nga mahimong makapugos sa mga politiko sa pagmenos, kay dili man mahitabong makapapas, sa ilang kahakog sa gahom ug katigayonan..
* * *
- Latest
