Wala sa hustong pamatasan

Daghan ang mibatikos sa China sa giingong unprofessional nga gihimo niini atol sa usa ka internasyonal nga panagtagbo sa mga eksperto sa defense sa Seoul, South Korea sa niaging semana.

Sa maong panagtigum, misekreto og pasa ang staff sa embahada sa China og usa ka papel ngadto kang Defense Secretary Gilbert Teodoro kinsa mihatag og speech sa international defense niadtong tungora.

Ang maong papel naglatid sa baruganan sa China sa territorial dispute niini uban sa Pilipinas sa West Philippine Sea. Matud niini, milapas kuno ang Pilipinas sa international law kabahin sa pagpasaka og kaso batok sa China.

Abtik usab nga gitubag ni Secretary Teodoro punto por punto ang mga pasangil sa China. Gani miani og mga pagdayeg si Teodoro gikan sa international community tungod intelligent niini nga counter-arguments.

Klaro nga wala sa hustong oras ug lugar ang lihok sa China niadtong tungora. Klaro nga nagpakita sa pagkawalay respeto ug diplomatikong pamatasan ang mga personnel sa China sa maong internasyonal nga kalihokan.

Angay masabtan nga wala sa tuno ang pagtugot sa usa ka sensitibo ug komplikado nga isyu sama sa maong territorial dispute nga mosingit sa usa ka panagtigom nga nagtinguha sa kooperasyon ug kalinaw.

Ug dinhi nasayop ang China.

Ang diplomasiya nagkinahanglan og respeto sa proseso. Ang paghatag sa maong papel nga wala sa oras nagpakita nga ang China wala magtahod sa hustong pamatasan sa internasyonal nga entablado.