MCIA nakadawat og 2 ka dagkong pasidungog
CEBU, Philippines — Nakadawat og duha ka dagkong recognition gikan sa Airports Council International (ACI) ang Mactan-Cebu International Airport (MCIA), nga dugang nagpalig-on sa posisyon niini isip usa sa mga nag-unang airport sa Asia-Pacific region.
Atol sa ACI Airport Experience Summit 2026 nga gipahigayon sa Istanbul, Turkey giila ang MCIA isip usa sa mga Best Airports in Asia-Pacific sa 5–15 milyon nga passenger category.
Kini na ang ikaduhang sunod-sunod nga tuig nga nakadawat ang MCIA sa ACI Airport Service Quality (ASQ) Customer Experience Awards ubos sa pagdumala sa Aboitiz InfraCapital (AIC) Airports.
Misaka usab ang MCIA ngadto sa Level 3 sa ACI Airport Customer Experience Accreditation, ug kini ang una ug bugtong airport sa Pilipinas nga nakaabot niini nga lebel.
Matud ni AIC Vice President ug Head of Airports Rafael M. Aboitiz, nagpamatuod ang maong mga recognition sa ilang commitment sa pagpalambo sa passenger experience ug pagpataas sa service standards sa airport.
Si AIC Airports Chief Executive Officer Athanasios Titonis miingon nga ang customer experience standards sa MCIA nahimong benchmark sa tibuok airport portfolio sa kompanya, lakip ang Bohol-Panglao International Airport ug Laguindingan International Airport.
Ang ASQ awards gibase sa mga survey sa aktuwal nga mga pasahero nga naglangkob sa nagkalain-laing touchpoints sa ilang airport journey.
Matud sa AIC, ang bag-ong mga recognition nagpakita sa padayong pagpamuhunan sa MCIA sa infrastructure, teknolohiya ug operasyon, lakip na ang mga paningkamot sa pagpalambo sa connectivity ug pagsuporta sa turismo, negosyo ug pamuhunan sa Cebu. (BANAT NEWS)
- Latest
