Sa akong pagtagik niini nahinumdom ko nga Death Anniversary diay ni Ate Judith “Jojo” Alegarbes. Mga lima ka mga tuig na ang nilabay sa dihang namatay si Ate Jojo.
Siya kadtong usa sa mga nisuporta kanako panahon sa akong pagtungha sa seminaryo. Kuyog sila si Ate Ellen ug ang kinatibuk-ang banay nga Orlanes.
Gikan 2001 hangtuud nga nigraduate ko sa seminaryo ug naordinahang pari sa 2006.
Matag karon ug unya magduawan ko niya didto sa iyang tindahan. Nadestino ko sa Sangi, Alegria sa dihang nipanaw siya. Apan lagi gumikan sa Covid Pandemic limitado ra kaayo ang kalihukan.
Ako nga gipatungha aron mahimong pari ang wala naman hinuon makamisa ni makahilog niya panahon sa dakong panginahanglan.
Mao sab ang gidangatan ni Kuya Boggie iyang igsuon ug sama nako Star Wars fanatic. Namatay siya panahon sa Covid.
Adunay mga butang sa atong kinabuhi nga lisod kaayo tugkaron. Dunay mga tawo nga suod sa atong kinabuhi nga ironically wala kita physically sa panahon sa ilang panginahanglan.
Apan ang pagkahimong absent wala man magpasabot nga wala kitay pagtagad ni paghigugma. Apan ang kahigayonan wala gyud motugot niadtong mga higayona.
Bugtong ang mga pag-ampo ug pangilaba nga unta mabatonan ang kapahulayang dayon sa ilang kalag. Ate Jojo sugaton ka sa mga anghel ug dad-on ka siyudad nga balaan ang bag-o ug tunhay nga Jerusalem. Salamat sa imonng kaayo!