Ang pag-usab-usab sa kalidad sa hangin ug ang pag-abot sa "acutely unhealthy" nga Air Quality Index (AQI 208) usa ka seryosong hulga sa panglawas sa mga Sugboanon, labi na sa mga bata ug kadtong dali ra takboyan og sakit ug apil na gani ang mga hamtong ug mga tiguwang na gyud, kitang tanang ang apektado ug angayan nga magmatngon.
Apan taliwala sa pahimangno sa mga eksperto sa panglawas ug sa kagamhanang lokal gibalewala ra man sa kadaghanan.
Gikanselar ang klase sukad kagahapon sa alas dos sa hapon sa Cebu City hangtud karon. Maayo kay nakadesisyon ang LGU apan ang ubang silingang syudad ug lungsod wala man, gipasul-ob lang og facemask ang mga bata.
Bisan og klaro kaayo ang peligro nga naa ra sa palibot nga inig ginhawa sa mga tawo maapil ang mga particles sa atong pag ginhawa pero kadaghanan sa mga tawo wala man magsol-ob og mask.
Gani ang mga bata sa Cebu City bisan gihatagan na og facemask apil, ang ilang mga ginikanan, gibutang ra man hinuon kini sa ulo nga gaw giduwa duwaan. Nangalipay sila nga naay haze kay wala may klase.
Sakto ug husto ang gihimo ni Mayor Nestor Archival ug sa Cebu City LGU nga paghatag dayon og N-95 facemask sa mga tinun-an, kauban ang pag-suspende sa physical classes ug pagpatuman og flexible work arrangements.
Ang paspas nga koordinasyon sa EMB-DENR ug sa CCDRRMO nagpakita nga andam ang dakbayan sa pagtubag sa mga krisis sa kalikopan.
Dili igo ang paghatag ra og facemask. Klaro sa report nga daghang bata ang nagkinahanglan pa og giya sa hustong pagsuot niini.
Ug ang mga ginikanan nagpabilin nga nabalaka. Kinahanglan ang mas lapad nga kampanya sa edukasyon ug pagpanalipod sa panglawas aron masayod ang tanan kon unsaon pag-atubang ang susamang klase sa air pollution.
Kini nga hitabo usa ka pahimangno nga dili lang kay kalamidad sama sa bagyo o baha ang kinahanglang pagapangandaman, kon dili lakip na usab ang pagkadaot sa kalidad sa hangin nga atong gihanggab matag adlaw.
Dili man dihadiha dahon ang epekto apan kong makalamay na lisod na usab kaayo kay kinabuhi ang nakataya niini kong ibaliwala ang dakong hulga nga naa sa hangin nga atong mahanggab.