Pagdugang og vaccination sites ug information campaign gihingusgan

CEBU, Philippines — Gihingusgan sa Department of Health (DOH) ang paningkamot sa pagdugang og vaccination sites ug information campaigns aron mas daghang kabataan sa Central Visayas ang mapanalipdan batok sa measles ug rubella.

Si DOH Secretary Edwin Mercado nibisita karong adlawa sa Measles-Rubella Supplemental Immunization Activity diha sa Banilad Daycare Center sa Dakbayan sa Mandaue diin iyang gisusi ang vaccination site ug giobserbahan ang padayong pagpamakuna.

Matud ni Mercado nga gidasig sa DOH ang pag-establisar og dugang nga vaccination sites gawas sa mga health center aron mas dali ug mas accessible alang sa mga ginikanan ug kabataan ang pagpabakuna. Base sa datos sa DOH, 11 porsyento pa lang sa target nga populasyon sa Central Visayas ang nabakunahan sukad gisugdan ang supplemental immunization activity batok sa measles ug rubella. Sa pagkakaron, ang Central Visayas ang adunay pinakaubos nga vaccination accomplishment taliwala sa mga rehiyon nga nagpatuman sa supplemental immunization activity. Si Mercado nagkanayon nga palig-onon sa DOH ang information ug education campaign sa mga barangay aron matubag ang fake news ug misinformation kabahin sa pagpabakuna.

Ang mga doktor sa DOH lakip ang mga personnel gikan sa city ug municipal health offices gilaoman nga magpatuman og house-to-house information campaigns aron matubag ang mga pangutana ug kabalaka sa mga ginikanan kabahin sa vaccination program.Gipasiugdahan usab sa DOH ang mall-based vaccination activities alang sa mga ginikanan nga dili makahimo sa pagdala sa ilang mga anak ngadto sa health centers o daycare centers.

Gipadayag ni Mercado ang importansiya sa pagtubag sa mga kabalaka sa mga ginikanan ug paghatag og tukmang impormasyon aron dasigon sila sa pagpabakuna sa ilang mga anak ug pagpanalipod kanila batok sa measles ug rubella.

Nitambong usab sa kalihokan si Mandaue City Lone District Representative Emmarie “Lolypop” Ouano-Dizon ug Mandaue City Mayor Jonkie Ouano. BDB BANAT NEWS