Tulo sa bubong, sumpo ang sapo

Dear Dr. Love,

Tawagin mo na lang akong Sammy. Mabait at maasikaso naman ang asawa ko sa karaniwang araw.

Pero ewan ko ba, kapag nagsimula nang umulan at pumatak ang tulo sa aming bubong, bigla na lang ding dumidilim ang kanyang timpla.

Habang busy ako sa pagpwesto ng mga timba at palanggana, busy naman siya sa pagbubuga ng sungit at sumpong.

Para bang pati ang pagsama ng panahon at ang butas sa bubong ay kasalanan ko! Sa halip na mainit na kape at yakap ang salubong sa tag-ulan, lamig at sermon ang umaapaw sa bahay.

Dr. Love, paano ko ba ipapaalala sa kanya na sa gitna ng bagyo at tulo, mas kailangan namin ang pagtutulungan at kaunting lambing bago pa tuluyang bahain ang aming relasyon?

Sammy

Dear Sammy,

Unang-una, saludo ako sa ‘yo. Hindi mada-ling maging handyman, tagasalo ng tubig, at tagasalo ng sumpong nang sabay-sabay sa gitna ng ulan!

Naiintindihan ko ang misis mo. Ang ingay at abala ng tulo ng bubong ay parang visual and auditory stress—nagpapalabas ng cortisol o stress hormone.

Pero hindi iyon dahilan para gawin kang lightning rod ng init ng ulo niya.

Ang buhay may asawa ay parang isang lumang bahay. Hindi ito laging bagong pintura o laging maayos ang bubong.

May mga panahong papasok ang bagyo, may mabubutas, at may mababasa. Ang tunay na tibay ng pagsasama ay hindi nasusukat kapag maaraw at komportable ang lahat, kundi kung paano kayo magkasamang humahawak ng timba kapag bumubuhos ang ulan.

Salo sa tubig, salo sa emosyon. Kapag nagsimula nang pumatak ang ulan at ang sumpong, huwag mong sabayan ang ingay ng patak sa palanggana.

Sumagot ka nang may lambing at kaunting humor. “Mahal, mahina ang bubong natin ngayon, pero si-guraduhin nating mas matibay ang pasensya natin.”

Kausapin mo siya sa ilalim ng araw, huwag sa gitna ng bagyo.

Huwag mong piliting makipag-debate habang nagmamadali kayong maglagay ng timba.

Kausapin mo siya kapag maganda ang panahon at maayos ang timpla ng kape. Sabihin mo, “nalulungkot ako kapag umuulan, kasi mas ramdam ko ang init ng ulo mo kaysa sa lamig ng panahon.”

Sikapin mo na maipaayos ang tunay na pinagmumulan. Mas madaling tapalan ng sealant ang yero kaysa gamutin ang nasirang loob. Kapag maaraw na, ipaayos  mo ang bubong—para sa susunod na umulan, kape at yakap na lang ang aasikasuhin ninyo.

DR. LOVE